Դատելով Հայաստանի անշարժ գույքի կադաստրի պետական կոմիտեի հուլիսյան տեղեկատվությունից, մայրաքաղաքային բնակարանների շուկայական գները բացարձակապես ոչ մի փոփոխությունների չեն ենթարկվել: Ինչպես եղել են հունիսին, նույն կերպ եւ մնացել են հուլիսին: Պաշտոնական տվյալների կերպափոխումները վաղուց են սկսվել, դեռ անցած տարվա գարնանը: Ավել վառ դրանք դրսեւորվել են մայրաքաղաքի Կենտրոն էլիտար վարչական շրջանում:
Անցած տարվա ապրիլին նշված շրջանում բնակարանների 1 քառ. մետրը, նախորդ ամսվա համեմատությամբ, բարձրացել էր 2 հազար դրամով՝ կազմելով ուղիղ 428 հազար դրամ: Դրանից հետո Պետկոմիտեի ամենամսյա հաշվետվություններում տխուր մոնոտոնությամբ շրջանառվում էր հենց այս մեծությունը: Մայրաքաղաքի մյուս շրջաններում եւս գները առանձնահատուկ շարժընթացությամբ աչքի չեն ընկել:
Վերջին 17 ամիսների ընթացքում գների «ոչ մեծ» աճ է նկատվել հեռավոր եւ բնակչության թվաքանակով ոչ այդքան մեծ Նուբարաշեն ծայրամասում՝ «քառակուսու» համար՝ 5 հազար դրամ, կամ 3,3% աճ: Երկրորդ տեղում է հայտնվել Մալաթիա-Սեբաստիայի շրջանը՝ համապատասխանաբար 3,7 հազար դրամ եւ 1,6% ցուցանիշներով: Երեւանի մյուս շրջաններում գների հավելաճը ավելի քիչ է՝ ձգտելով վերոհիշյալ Կենտրոն շրջանի զրոյականին:
Սակայն շատերի մոտ այս «համեստ» թանկացումը կասկածներ է հարուցում: Գաղտնիք չէ, որ անշարժ գույքի հայաստանյան շուկայում առաջարկը գերազանցում է գնողունակ պահանջարկը, եւ այդ պայմաններում գների աճը պարզապես անհեթեթություն է:
Պաշտոնական տվյալներով՝ մայրաքաղաքում ավելացել է բնակարանների առքուվաճառքի գործարքների թիվը: Ինչպես հայտնի է, սոցիալական բնակարանային ծրագրի շրջանակներում պետությունը սուբսիդավորում է հիպոթեքային վարկերը: Մասնավորապես «Մատչելի բնակարան երիտասարդ լրագրողներին, բժիշկներին, մանկավարժներին եւ մարզիկներին» նախագծի շրջանակներում շահագործման են հանձնվել Ավան շրջանի Ծարավ Աղբյուր փողոցի բազմաբնակարան տները: Նախագծից 338 մարդ է օգտվել:
Անշարժ գույքի գործակալություններից մեկի կայքում հայտարարություն է տեղադրված նույն փողոցում նոր բնակարանի արժեքի մասին: Հաշվարկներով՝ առաջարկի գները տատանվում են մեկ քմ-ի համար 838-909 դոլարի սահմաններում: Մեկ քմ-ի պաշտոնական միջին գինը հուլիսին կազմել է 639 դոլարին համարժեք դրամ, բայց արժեքների տարբերությունն ամբողջովին հասկանալի է: Այդ արժեքի վրա ազդում է ինչպես նոր բնակարանի գործոնը, այնպես էլ շենքերի հարմար վայրում տեղակայված լինելը: