Իշխանությունը չի տառապում ՀՀ երկրորդ նախագահ Ռոբերտ Քոչարյանի քաղաքականություն վերադառնալու խնդրով: Այս մասին այսօր՝ սեպտեմբերի 1-ին NEWS.am-ի հետ զրույցում ասաց Ազգային ժողովի փոխնախագահ Էդուարդ Շարմազանովը, պատասխանելով մեր այն հարցին, թե արդյոք երկրորդ նախագահի վերջին հայտարարությունը կարելի է դիտարկել որպես վերադարձի հավակնություն։
«Ճիշտ հասցերատեր չեք ընտրել: Նրա վերադառնալու կամ չվերադառնալու խնդրով մենք ոչ տառապում ենք, ոչ էլ քննարկում, դա իր իրավունքն է՝ կուզի կվերադառնա, չուզի չի վերադառնա: Այդ հարցը պետք է ուղղեք իր շրջապատին եւ իր գրասենյակին»,- ասաց Էդուարդ Շարմազանովը:
Ազգային ժողովի փոխնախագահը չցանկացավ մեկնաբանել նաեւ Ռոբերտ Քոչարյանի այն հայտարարությունը, որ ինքը տնտեսության զարգացման նախադրյալներ չի տեսնում. «Ես հարկ չեմ համարում մեկնաբանել, որովհետեւ նորություն չէ , որ երկրորդ նախագահը պարբերաբար հանդես է գալիս հայտարարություններով եւ հարցազրույցներով: Ես որեէ նոր բան այնտեղ չեմ տեսել, դրա համար մեկնաբանության կարիք չեմ տեսնում»:
Շարմազանովի խոսքով, իրենց չի անհանգստացնում նաեւ ոչ իշխանական քառյակի թեժ աշնան խոստումները։
«Իշխանությունը շատ բնական է ընդունում քաղաքական պայքարը, երբեմն նաեւ՝ թեժ պայքարը, բայց օրենքի սահմաններում: Ես 2000-ականներից արդեն շուրջ 10 տարի զբաղվում եմ քաղաքականությամբ, եւ չեմ հիշում մի աշուն, երբ սեպտեմբերի նախօրեին քաղաքական ուժերը՝ նամանավանդ ընդդիմադիր ուժերը, չէին հայտարարում թեժ աշնան մասին: Որեւէ անհանգստություն չունենք, որովհետեւ ավելի լուրջ խնդիրներ ունենք լուծելու»,- ասաց Էդուարդ Շարմազանովը:
