Արագածոտնի մարզի Լեռնապար համայնքում նոր ուսումնական տարին աշակերտները դիմավորել են նորակառույց դպրոցում, իսկ Նիգավանի դպրոցը դռներն է բացել վերանորոգումից հետո: Հայաստանի փոխվարչապետ, տարածքային կառավարման նախարար Արմեն Գեւորգյանն այսօր՝ սեպտեմբերի 1-ին, այցելել է այս համայնքներ: Այս մասին տեղեկանում ենք Տարածքային կառավարման նախարարության հասարակայնության հետ կապերի բաժնից:
Փոխվարչապետը ներկա է գտնվել Լեռնապարի դպրոցի բացման արարողությանը, Գիտելիքի օրվա եւ նոր ուսումնական տարվա մեկնարկի կապակցությամբ շնորհավորել է մանկավարժներին ու դպրոցի սաներին՝ վստահություն հայտնելով, որ նոր պայմանները կնպաստեն ուսումնական գործընթացի արդյունավետության եւ աշակերտների առաջադիմության բարձրացմանը:
«Մարզերում դպրոցների շենքային պայմանների բարելավման խնդիրը կառավարության ուշադրության կենտրոնում է: Մենք շարունակելու ենք կրթական ենթակառուցվածքների զարգացման ծրագրերը եւ կարեւորում ենք, որ մարզերի դպրոցներում նույնպես աշակերտների համար լավագույն պայմանները ստեղծվեն»,- հավաստել է Արմեն Գեւորգյանը:
Լեռնապարի միջնակարգ դպրոցի նոր շենքի կառուցման համար պետբյուջեից շուրջ 392 մլն դրամ է հատկացվել: Կրթօջախը նախատեսված է 180 աշակերտի համար:
Իսկ Նիգավանում փոխվարչապետը մասնակցել է վերանորոգված նախակրթարանի բացմանը: Նախակրթարանի եւ դպրոցի շենքերի վերանորոգումն իրականացվել է պետության եւ «Փրկեք երեխաներ» բարեգործական կազմակերպության միջոցներով: Մարզերի առաջնահերթ խնդիրների հրատապ ծրագրերով շուրջ 42 մլն դրամ է հատկացվել դպրոցի ուսումնական մասնաշենքի հիմնանորոգման նպատակով, իսկ «Փրկեք երեխաներ» կազմակերպությունը նախակրթարանի, մարզադահլիճի վերանորոգման, սանհանգույցների կառուցման համար հատկացրել է 43 մլն դրամ:
Փոխվարչապետն այստեղ հանդիպել է նաեւ բնակիչների հետ: Երկու համայնքներում էլ խնդիրները նման են. բարձրացվել են մայրուղուց համայնքներ տանող ճանապարհի բարեկարգման, խմելու ջրի մատակարարման, հողօգտագործման հետ կապված հարցեր: Արմեն Գեւորգյանը հավաստել է, որ բոլոր այդ խնդիրները կքննարկվեն համապատասխան ոլորտների պատասխանատուների հետ:
Նիգավանում բնակիչները բարձրացրել են նաեւ համայնքի վարչական տարածքում գտնվող Ապարանի աղբավայրի տեղափոխման հարցը: Արմեն Գեւորգյանը մարզպետին հանձնարարել է Քաղաքաշինության նախարարության եւ Ապարանի քաղաքապետարանի պատասխանատուների մասնակցությամբ ուսումնասիրել խնդիրը: