Նիգերիայի հյուսիս-արեւելքում բախումներ են բռնկվել «Բոկո Հարամ» արմատական խմբավորման գրոհայինների եւ կառավարական բանակի ուժերի միջեւ: Այս մասին գրում է ԻՏԱՌ-ՏԱՍՍ-ը:
Երկրի ուժային կառույցների աղբյուրների համաձայն՝ «ծայրահեղականների բազմաթիվ ջոկատներ հարձակվել են զինված ուժերի դիրքերի վրա Բամա բնակավայրում»: Զինծառայողները պատասխան կրակ են բացել: «Ակնհայտ է, որ «Բոկո Հարամ»-ի գրոհայինները հարձակվել են Բամայի վրա ծավալուն հարձակումից առաջ, որի նպատակը նոր տարածքների գրավումն է»,- նշել են Նիգերիայի անվտանգության մարմինների ներկայացուցիչները:
Խաղաղ բնակիչները զանգվածաբար լքում են քաղաքը եւ ուղեւորվում Մայդուգուրի՝ Բորնո նահանգի վարչական խոշոր կենտրոն:
Նշենք, որ վերջին 5 տարվա ընթացքում Նիգերիայում «Բոկո Հարամ»-ի ահաբեկչական գործողությունների զոհ է դարձել ավելի քան 10 հազար մարդ: Մայրաքաղաք Աբուջայում սեպտեմբերի 3-ին սպասվում է միջազգային նախարարական հանդիպում, որը նվիրված կլինի «Բոկո Հարամ»-ի ծայրահեղականների դեմ պայքարին:
