Կուբայի հեղափոխության առաջնորդ Ֆիդել Կաստրոն ՆԱՏՕ-ի երկրների ներկայացուցիչներին համեմատել է Ադոլֆ Հիտլերի ժամանակների գերմանացի նացիստների հետ: Այդ մասին նա հայտարարել է Cubadebate.cu կայքի իր սյունյակում, հայտնում է gazeta.ru-ն:
«Գաղափարի հաղթանակը կամ աղետի հաղթանակը» վերնագրով նոր հոդվածում նա քննադատել է ԱՄՆ եւ եվրոպական երկրների գործողությունները:
«Աշխարհը վերջին տարիներին ազատ շունչ չի քաշել ԵՄ գործողությունների պատճառով, որոնք կառավարում է ԱՄՆ-ն: Նրանք որոշել են հաշվեհարդար տեսնել երկու մեծ ազգերի հետ (Չինաստան եւ Ռուսաստան), որոնք, ոգեշնչվելով Մարքսի գաղափարներով, հերոսություն են կատարել եւ վերջ տվել Եվրոպայի եւ ԱՄՆ-ի կողմից աշխարհին պարտադրված գաղութային եւ կայսերական աշխարհակարգին», — հայտարարել է Կաստրոն:
Ըստ նրա` առջիկայում դոլարը եւ եվրոն կախված կլինեն յուանից եւ ռուբլուց:
«Ես Արեւմուտքին մեղադրում եմ ցինիկության մեջ եւ ասում, որ այդ գիծը իմպերիալիստական քաղաքականության խորհրդանիշն է», — ընդգծել է Կուբայի նախկին առաջնորդը:
Դիմելով ՆԱՏՕ-ին` Կաստրոն հայտարարել է, որ դաշինքի ներկայացուցիչները իրեն հիշեցնում են նացիստական Գերմանիայի ստորաբաժանումները:
«Ագահության վրա հիմնված Ադոլֆ Հիտլերի կայսրությունը անփառունակ էջ դարձավ պատմության մեջ, նույնը ներկայումս ՆԱՏՕ-ի կողմից բուրժուական եւ ագրեսիվ կառավարությունների քաջալերումն է, որը նրանց ծաղրի առարկա է դարձնում ողջ աշխարհի աչքում», — ընդգծել է 88-ամյա Կաստրոն: