Ռուսական զորքերն Ուկրաինայի տարածքում լայնածավալ ռազմական գործողություններ են սկսել դեռեւս օգոստոսի 24-ից, հայտնել է Ուկրաինայի ՆԳ նախարարի խորհրդական Անտոն Գերաշչենկոն:
Կիեւը Մոսկվային մեղադրում է ռազմական ներխուժման եւ Ուկրաինայի արեւելքում մղվող մարտերին ռուսական զորքերի մասնակցության համար: Մոսկվան կտրականապես հերքում է մեղադրանքները:
Ուկրաինայի նախագահ Պյոտր Պորոշենկոն Գերագույն ռադայի խմբակցությունների հետ խորհրդակցությունից հետո երկուշաբթի որոշել է երկրում ռազմական դրություն չհայտարարել:
«Փաստացի այս ամբողջ խնդիրը ծագեց նաեւ նրա համար, որ ռուսական բանակի մուտքից հետո ժամանակին քայլեր չձեռնարկվեցին: Իսկ այն մտել էր ոչ թե օգոստոսի 27-ին, այլ 24-ին: Դա ուղիղ ագրեսիա էր: Եկան մինչեւ ատամները զինված օդադեսանտային դիվիզիաներ եւ հարձակվեցին մեր տղերքի վրա, որոնք այնտեղ են արդեն ամիսներով՝ հոգնած, վերջացող զինամթերքով»,- հայտարարել է Անտոն Գերաշչենկոն ուկրաինական «5-րդ ալիքի» հետ զրույցում:
Ավելի վաղ Ուկրաինայի պաշտպանության նախարար Վալերի Գելեթեյը Facebook-ում գրել էր, որ ռուսաստանցի զինվորականները հակամարտությանը մասնակցում են «դիվիզիաներով ու գնդերով, եւ որ Մոսկվան պատրաստ է Ուկրաինայի դեմ կիրառել մարտավարական միջուկային զենք:
ՌԴ ԱԳՆ-ն քննադատել էր Գելեթեյի խոսքերը՝ դրանք համարելով ոչ ադեկվատ:
Սեպտեմբերի 1-ի երեկոյան Պորոշենկոն Ուկրաինայի ԶՈՒ գլխավոր շտաբի ընդլայնված նիստ էր անցկացրել Ուկրաինայի արեւելքի իրավիճակը քննարկելու համար, սակայն կայացված որոշումների մասին ոչինչ չի հաղորդվում:
