Ռուսաստանի Դաշնության օմբուդսմեն Էլլա Պամֆիլովան համապատասխան գրություններով դիմել է պատկան մարմիններին, որ նրանք ուշադրություն դարձնեն Մոսկվայում կալանավորված ռուսաստանաբնակ հայ գործարար Լեւոն Հայրապետյանի առողջական խնդիրներ վրա եւ անհրաժեշտության դեպքում տեղափոխեն քաղաքացիական հիվանդանոց: Այս մասին NEWS.am-ին ասաց Հայաստանում մարդու իրավունքների պաշտպան խորհրդական Երանուհի Թումանյանցը:
«Լեւոն Հայրապետյանի հարցով մենք մշտապես հեռախոսակապի մեջ ենք Ռուսաստանի մեր գործընկերների հետ, նրանք այժմ ուսումնասիրում են գործը, որից հետո ՌԴ օմբուդսմենը հնարավոր է դիմի պատկան մարմիններին: Շեշտադրումը հիմնականում առողջական խնդիրների վրա է, քանի որ մենք էլ ենք հենց դա առաջնային համարում: ՌԴ օրենքով Լեւոն Հայրապետյանին նման հիվանդությունների դեպքում չպետք է պահել կալանավայրում, այդ իսկ պատճառով մեր գործընկերը դիմել է պատկան մարմիններին»,- ասաց նա:
Նշենք, որ օգոստոսի 7-ին «Ի պաշտպանություն Լեւոն Հայրապետյանի» քաղաքացիական նախաձեռնությունը բողոքի ակցիա էր կազմակերպել ՄԻՊ գրասենյակի, ՀՀ-ում ՌԴ դեսպանատան եւ Հայաստանի ԱԳՆ-ի առջեւ՝ պահանջելով արձագանքել հայ բարերարի կալանավորմանն ու քայլեր ձեռնարկել՝ նրան օգնելու համար:
Հիշեցնենք, որ հուլիսի 24-ին Ռուսաստանի Դաշնության Քննչական կոմիտեն «Բաշնեֆտ» ընկերության բաժնետոմսերը հափշտակելու եւ անօրինական ճանապարհով ստացված գումարները յուրացնելու մեջ կասկածվող հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով: Սեպտեմբերի 1-ի երեկոյան Լեւոն Հայրապետյանը տեղափոխվել է քաղաքացիական հիվանդանոց:
