ԱՄՆ-ի Օրեգոն Սիթիում օրերս հետաքրքիր դեպք է տեղի ունեցել՝ 8-ամյա տղայի եւ ամենավտանգավոր ցեղատեսակի շան մասնակցությամբ: Փոքրիկ Ջեսի Քոուլը մյուս երեխաների հետ խաղացել է գետի մոտ, երբ նրանցից մեկը կանգնել է մեղվի փեթակի վրա: Բոլորն անմիջապես փախչել են, իսկ Ջեսին հապաղել է: Նրան առնվազն 24 անգամ խայթել են:
Բարեբախտաբար, այդ պահին սկսել է գործել ամերիկյան պիտբուլը՝ Աիդ անունով: Նա տեսել է խոտի վրա պառկած երեխային ու տուն տարել նրան: «Աիդը տեսավ, թե ինչ է կատարվել, եւ ինձ դուրս բերեց այնտեղից: Նա ինձ մորս մոտ տարավ»,- տղայի խոսքերն է մեջբերում «The Huffington Post»-ը:
«The New York Daily News»-ը հավելում է, որ պիտբուլը Ջեսիին քարշ է տվել՝ ատամներով բռնելով տաբատից: Տղան ու նրա 14-ամյա քույր Ժասմինը, ովքեր մեղվի խայթոցից ալերգիա ունեն, հիվանդանոց են տեղափոխվել: Ճանապարհին նրանց երկու անգամ ադրենալին են ներարկել: Մի քանի ժամ անց երեխաներին թույլ են տվել տուն վերադառնալ:
Աիդին մեղուները նույնպես խայթել են, սակայն, մասնագետների պնդմամբ, լուրջ հետեւանքներ նրան չեն սպառնում: Ջեսի Քոուլի մայրը վստահեցնում է, որ տղան անչափ շնորհակալ է շանը, որը փրկել է իր կյանքը: