Եվրասիական միություն մտնելը բիզնեսին բազմաթիվ արտոնություններ կտա: Այս մասին սեպտեմբերի 2-ին լրագրողներին ասել է ԱԺ պատգամավոր, ԱԺ ֆինանսավարկային եւ բյուջետային հարցերի հանձնաժողովի նախագահ Գագիկ Մինասյանը:
Ըստ նրա` դրանցից մեկը սահմանին ներկրման ժամանակ ԱԱՀ-ի գանձումը հետաձգելն է: ԵՏՄ-ում գործող կանոնադրության համաձայն`ներմուծված ապրանքից ԱԱՀ վճարելը պետք է իրականացվի հաջորդ ամսվա 20-րդ օրվանից ոչ ուշ: «Շրջանառվող կապիտալի այդպիսի ձգձգումը ձեռնտու կլինի ներկրողներին: Իհարկե, 50 օրն այնքան էլ երկար ժամկետ չէ ապրանքը վաճառելու համար: Սակայն եթե ընտրենք` 50 օրվա կամ 1-ի միջեւ, իհարկե, ավելի լավ է 50 օրը», - նշել է Մինասյանը:
Եվս մեկ հնարավորությունը, որի մասին բազմիցս խոսվել է, ռուսական շուկա ներկրվող ապրանքների կրճատումն է` Արեւմուտքի դեմ պատժամիջոցների պատճառով: «Այդ պատճառով էլ մեզ համար արտահանման նոր հնարավորություններ են ստեղծվում, հատկապես` գյուղատնտեսական ապրանքների մասով, որտեղ «հայկական» ապրանքատեսակն ավանդաբար գնահատվում է Ռուսաստանում», - հավելել է նա: