Բնապահպանության նախարարության աշխատակազմի ղեկավար Էդգար Փիրումյանը աշխատանքից ազատվելու դիմում է գրել այլ աշխատանքի անցնելու կապակցությամբ: Այս մասին NEWS.am-ի թղթակցի հետ զրույցում ասաց Էդգար Փիրումյանը:
Իսկ թե ինչ աշխատանքի է նա անցնելու, որտեղ, մանրամասներ չհայտնեց. « Դե կիմանաք էլի, ժամանակին ամեն ինչ կիմանաք»,- ասաց աշխատակազմի ղեկավարը: Նա միայն նշեց, որ ապագա աշխատանքը կլինի պետական համակարգում: Հարցին, թե հնարավոր է նոր աշխատանքը լինի բնապահպանության նախկին նախարար, այժմ Կոտայքի մարզպետ Արամ Հարությունյանի հետ, մարզպետարանում, նա բացասական պատասխան տվեց:
Էդգար Փիրումյանը վստահեցրեց, որ իրեն չեն ստիպել դիմում գրել եւ ինքը կադրային ջարդի զոհ չէ:
Ավելի վաղ NEWS.am-ը հայտնել էր, որ սեպտեմբերի 4-ին կառավարության նիստի օրակարգում ընդգրկված է ՀՀ բնապահպանության նախարարության աշխատակազմի ղեկավար Էդգար Փիրումյանին զբաղեցրած պաշտոնից ազատելու մասին որոշման նախագիծ:
Ըստ նախագծի` Էդգար Փիրումյանը կազատվի բնապահպանության նախարարության աշխատակազմի ղեկավարի պաշտոնից` հիմք ընդունելով «Քաղաքացիական ծառայության մասին» Հայաստանի Հանրապետության օրենքի 15-րդ հոդվածի 2.1-ին կետը և 33-րդ հոդվածի 1-ին կետի «ա» ենթակետը, այսինքն սեփական դիմումի համաձայն:
