Թուրքիայի նախագահ Ռեջեփ Թայիփ Էրդողանին ուղղված հրավերը՝ Հայաստան այցելել 2015-ի ապրիլի 24-ին, քայլ է, որը Թուրքիային պատային իրավիճակի մեջ կդնի, եւ Հայաստանի համար դրական դրություն կստեղծի: Այս մասին, այսօր՝ սեպտեմբերի 2-ին, ԱԺ-ում արտաքին քաղաքականության հարցերով փակ քննարկումից հետո լրագրողների հետ զրույցում նշել է անկախ պատգամավոր Էդմոն Մարուքյանը:
Նա պարզաբանել է, որ եթե Էրդողանը ժամանի Հայաստան, դա խնդիր կլինի Թուրքիայի համար: Եթե այցելությունը չկայանա, դա կրկին խնդիր կլինի Անկարայի համար: «Եթե Թուրքիայի նախագահը գա Հայաստան, իր այցելությամբ նա կճանաչի Հայոց ցեղասպանությունը»,-կարծիք է հայտնել Մարուքյանը;
Հիշեցնենք, որ օգոստոսի 28-ին, Հայաստանի ԱԳ նախարար Էդվարդ Նալբանդյանը ներկա է եղել Էրդողանի երդմնակալության արարողությանը, որի ժամանակ նրան է հանձնել 2015-ի ապրիլի 24-ին Երեւան այցելելու Սերժ Սարգսյանի հրավերը:
