ՄԱԿ-ի գլխավոր քարտուղար Բան Կի-Մունը հայտարարել է, որ համաշխարհային հանրությունը վրդովված է «Իսլամական պետության» գրոհայինների կողմից ամերիկյան Time թերթի թղթակից Սթիվեն Սոթլոֆի մահապատժից, հայտնում է Agence France-Presse-ը:
«Մենք բոլորս զայրացած ենք Իրաքից ստացված լուրերից` «Իսլամական պետության» գրոհայինների կողմից քաղաքացիական անձանց դաժան սպանությունների վերաբերյալ, այդ թվում նաեւ եւս մեկ լրագրողի մահապատժի լուրից»,- հայտարարել է ՄԱԿ-ի գլխավոր քարտուղարը Նոր Զելանդիա այցի ժամանակ:
Ամերիկացի լրագրող Սթիվեն Սոթլոֆի հարազատները հաստատել են մահապատժի տեսագրության իսկությունը:
Առաջիկայում Սոթլոֆի ընտանիքը մտադիր չէ հրապարակային հայտարարություններ անել: Վաշինգտոնը նույնպես պաշտոնական հայտարարություններ չի արել տեսագրության իսկության վերաբերյալ:
Սոթլոֆի ենթադրյալ մահապատժի տեսագրությունն իսլամիստները հրապարակել էին սեպտեմբերի 2-ին: Տեսագրության խորագիրն է «Երկրորդ ուղերձն Ամերիկային»: Թղթակցի սպանությունից հետո մարդասպանը սպառնում է մահապատժի ենթարկել եւս մեկ պատանդի` բրիտանացի Դեյվիդ Հեյնսին, եւ մյուս երկրների կառավարություններին կոչ է անում հրաժարվել աջակցել «Իսլամական Պետության դեմ ամերիկյան սատանայական դաշինքին»:
Հիշեցնենք, որ իսլամիստների դաժան հակաամերիկյան գործողության առաջին զոհը ԱՄՆ-ից լրագրող Ջեյմս Ֆոուլին էր: Նրա սպանության մեջ կասկածվում է 23-ամյա Աբդել Մաջիդ Աբդել Բարին, որը նախկինում ապրել է Լոնդոնում:
