Apple-ի սմարթֆոնների սիրահարները, կարծես, երեք-չորս շաբաթ պետք է սպասեն՝ նոր iPhone 6 Plus-ը ստանալու համար: Նոր հեռախոսների ռեկորդային քանակությամբ պատվերների պատճառով iPhone 6 Plus մոդելի մատակարարումները շուրջ մեկ ամիս հետաձգվելու են:
Ըստ Reuters-ի, Apple-ը հայտարարել է, որ ԱՄՆ-ում նոր iPhone 6-ը վաճառքի կհանվի սեպտեմբերի 19-ին: Սեպտեմբերի 11-ից ընկերությունը սկսել է առցանց-պատվերներ ընդունել: Այդ պատճառով էլ Apple-ը որոշել է հետաձգել iPhone 6 Plus-ի մատակարարումները:
«Մենք iPhone 6 եւ iPhone 6 Plus մոդելների աննախադեպ պահանջարկ ունենք: Նոր iPhone 6-ի նախնական պատվերների թիվը գերազանցել է iPhone-ի նախկին բոլոր մոդելների պահանջարկը»,- ասել է Apple-ի մամուլի քարտուղար Թրուդի Մյուլլերը:
Հիշեցնենք, որ սեպտեմբերի 9-ին Apple Computers կորպորացիան ներկայացրեց նոր սերնդի iPhone-ները՝ iPhone 6-ն ու iPhone 6 Plus-ը: Շնորհանդեսը կայացավ ընկերության Կուպերինոյի գրասենյակում (Կալիֆորնիա):