ՄԱԿ-ի Վիեննայի գրասենյակի Կանանց խորհուրդը դրամական միջոցներ է հատկացրել Գյումրիում հաշմանդամություն ունեցող երեխաների խաղահրապարակի կառուցման ծրագրի համար:
ԱԳՆ մամուլի ծառայությունից տեղեկանում ենք, որ սեպտեմբերի 12-ին Վիեննայի միջազգային կազմակերպություններում ՀՀ մշտական ներկայացուցչությունը «Հայաստան» կենտրոնում կազմակերպել էր միջոցառում ՄԱԿ-ի Վիեննայի գրասենյակի Կանանց խորհրդի անդամների համար` ՀՀ մշտական ներկայացուցչի տիկնոջ` Սուսաննա Նազարյանի հովանու ներքո: Միջոցառմանը ներկա էին Կանանց խորհրդի գործադիր մարմնի ներկայացուցիչները, ՄԱԿ-ի միջազգային գործակալություններում աշխատող հայ կանայք, կին դիվանագետներ եւ դիվանագետների կանայք:
Ողջույնի խոսքով հանդես եկավ ՀՀ մշտական ներկայացուցիչ, դեսպան Արման Կիրակոսյանը, որն իր խոսքում բարձր գնահատեց ՄԱԿ-ի Վիեննայի գրասենյակի Կանանց խորհրդի կողմից իրականացվող բարեգործական գործունեությունը եւ վերահաստատեց ՀՀ մշտական ներկայացուցչության աջակցությունն իրականացվող միջոցառումներին:
Կանանց խորհրդի փոխնախագահը շնորհակալություն հայտնեց ՀՀ մշտական ներկայացուցչությանը` խորհրդի կողմից կազմակերպվող ամենամյա բարեգործական տոնավաճառներին ակտիվ եւ արդյունավետ մասնակցության համար, եւ տեղեկացրեց, որ խորհուրդն ընտրել է մշտական ներկայացուցչության կողմից ներկայացված Գյումրիում հաշմանդամություն ունեցող երեխաների համար հատուկ խաղահրապարակի կառուցման ծրագիրը, որն իրականացվելու է «Ագաթ» հատուկ կարիքներով կանանց հասարակական կենտրոնի կողմից: Ծրագրի իրականացման համար Կանանց խորհրդի կողմից հատկացվել է 7000 եվրո գումար: