Բասկերի Երկրի խորհրդարանի կողմից Լեռնային Ղարաբաղի Հանրապետության անկախության ճանաչմամբ եվրոպական մայրցամաքում Արցախի ճանաչման գործընթացում նոր փուլ է սկսվում: Այս մասին NEWS.am-ի թղթակցի հետ զրույցում հայտարարեց Արցախի Հանրապետության նախագահի մամուլի խոսնակ Դավիթ Բաբայանը:
Նրա խոսքով, եվրոպական կազմավորումները, փաստորեն, արդեն սկսել են ճանաչել Արցախի անկախությունը: «Մենք բազմիցս նշել ենք, որ ընդլայնելու ենք Արցախի ճանաչման աշխարհագրությունը: Հայտնի է, որ ամերիկյան վեց նահանգներ եւ Ավստրալիայի մեկ նահանգ ճանաչել են ԼՂՀ անկախությունը, նույնը սկսվել է նաեւ եվրոպական մայրցամաքում: Կարծում եմ՝ այդ շատ կարեւոր է եւ ցույց է տալիս, առաջին հերթին, որ Հայաստան-Արցախ-Սփյուռք եռամիասնությունն արդյունավետ է աշխատում»,- նշեց Դավիթ Բաբայանը:
Բացի այդ, սա վկայում է այն մասին, որ Լեռնային Ղարաբաղը ժողովրդավարական պետություն է: «Հակառակ դեպքում ոչ ոք չէր ճանաչի Արցախի Հանրապետության անկախությունը, առավել եւս՝ Բասկերի Երկիրը, որն ինքն էլ ինքնորոշման ճանապարհին է: Այդ նշանակում է, որ Լեռնային Ղարաբաղի Հանրապետությունը ճիշտ ուղիով է զարգանում, որն ընդունելի է նաեւ եվրոպական պետությունների համար»,- ամփոփեց ԼՂՀ նախագահի մամուլի խոսնակը:
Հիշեցնենք, որ Բասկերի Երկրի խորհրդարանը սեպտեմբերի 12-ին Լեռնային Ղարաբաղի ինքնորոշման իրավունքի մասին բանաձեւ է ընդունել: Դրանով Բասկերի Երկրի խորհրդարանն աջակցություն է հայտնում ԵԱՀԿ Մինսկի խմբի ջանքերին եւ նշում, որ վստահության ամրապնդմանն ուղղված միջոցառումների վերաբերյալ Մինսկի խմբի առաջարկությունների իրականացումն անհրաժեշտ պայման է հակամարտության կարգավորման համար: Խորհրդարանը նաեւ կողմերին կոչ է անում սահմանագծից հեռացնել դիպուկահարներին եւ ակտիվացնել հրադադարի խախտման միջադեպերի հետաքննության մեխանիզմները:
Արցախի Ղարաբաղի անկախությունը ճանաչել են ամերիկյան Մասաչուսեթս, Մեն, Ռոդ Այլենդ, Լուիզիանա եւ Կալիֆորնիա նահանգները, ինչպես նաեւ ավստրալական Նոր Հարավային Ուելս նահանգը: