Նախագահ Սերժ Սարգսյանն այսօր շնորհավորական ուղերձ է հղել Ռուսաստանի Դաշնության կառավարության նախագահ Դմիտրի Մեդվեդեւին՝ ծննդյան օրվա առթիվ:
«Հարգելի Դմիտրի Անատոլիի,
Ընդունեք սրտանց շնորհավորանքներս Ձեր ծննդյան օրվա առթիվ:
Մաղթում եմ Ձեզ քաջառողջություն եւ նոր հաջողություններ Ձեր պետական ծառայության մեջ՝ ի շահ Ռուսաստանի Դաշնության բարգավաճման:
Ձեր պրոֆեսիոնալիզմի եւ հետեւողական ջանքերի շնորհիվ վերջին տարիներին Ռուսաստանի սոցիալ-տնտեսական զարգացման, ժամանակակից աշխարհում նրա դերի եւ ազդեցության օրինաչափ մեծացման գործում արձանագրվել են անառարկելի հաջողություններ:
Կցանկանայի հատկապես ընդգծել Ձեր անձնական ներդրումը հայ-ռուսական դաշնակցային փոխգործակցության ամրապնդման գործում` հիմնված մեր երկրների ժողովուրդների բազմադարյա բարեկամության վրա:
Մեր պետությունների կառուցողական համագործակցությունը եվրասիական ինտեգրացիոն գործընթացներում եւ այլ բազմակողմ ձեւաչափերում նոր հեռանկարներ է բացում երկկողմ դաշնակցության էլ ավելի խորացման եւ զարգացման համար:
Վստահ եմ, որ ձեռք բերված պայմանավորվածությունների հետեւողական իրականացումը հետագայում եւս կնպաստի մեր երկրների եղբայրական ժողովուրդների բարեկամության ամրապնդմանը, կծառայի տարածաշրջանային կայունության եւ անվտանգության ամրապնդմանը:
Հարգելի Դմիտրի Անատոլիի, սրտանց մաղթում եմ Ձեզ երջանկություն, բարօրություն եւ նոր հաջողություններ»,-ասված է ՀՀ նախագահի շնորհավորական ուղերձում:
