«Իսլամական պետություն» (ԻՊ) խմբավորման զինյալները մահապատժի են ենթարկել ավելի վաղ Իրաքի հյուսիսում, Քիրքուք քաղաքից 40 կմ դեպի արեւմուտք գտնվող գյուղերից մեկից առեւանգված 20 բնակչից 4-ին: Al Arabiya հեռուստաալիքի փոխանցմամբ, ծայրահեղականների զոհ են դարձել գյուղապետն ու նրա երեք ազգականները:
Հեռուստաալիքի տվյալներով, «Իսլամական պետության» զինյալները նրանց մեղադրել են իրենց խմբավորմանը դիմադրելու համար: Նրանց մարմինները հայտնաբերվել են անապատային վայրում: Զոհերի ինքնությունը հաստատվել է լուսանկարների օգնությամբ: Մյուս պատանդների ճակատագիրն անհայտ է:
Իրաքյան գյուղի բնակիչներին ծայրահեղականներն առեւանգել էին անցյալ հինգշաբթի: Նրանց թվում սուննիների «Աս-Սահվա» խմբավորման նախկին անդամներ կան, ովքեր ահաբեկիչների հետ միասին մասնակցել են կառավարական զորքերի դեմ կռիվներին:
«ԻՏԱՌ ՏԱՍՍ»-ի փոխանցմամբ, վերջին շրջանում «Իսլամական պետությունն» ավելի հաճախ է առեւանգում խաղաղ բնակիչների, որոնց հետո մահապատժի է ենթարկում: Մինչեւ հիմա ոչինչ հայտնի չէ նաեւ «Սփայքեր» բազայում առեւանգված զինծառայողների ճակատագրի մասին: Անցյալ շաբաթ զինյալները նաեւ 50 մարդ էին առեւանգել Քիրքուք նահանգում: