Հայաստանի ԱԻՆ-ում, այսօր՝ սեպտեմբերի 15-ին, ժամը 04.43-ին տեղեկատվություն է ստացվել, որ Երեւանի Թումանյան փողոցում` «Ինեկո» բանկի մոտակայքում, տեղի է ունեցել ավտովթար` հրդեհի բռնկումով, կան տուժածներ. անհրաժեշտ է փրկարարների օգնությունը:
Հայաստանի ԱԻՆ փրկարար ծառայությունից հայտնում են, որ դեպքի վայր է մեկնել երկու մարտական հաշվարկ:
Դեռեւս չբացահայտված հանգամանքներում Թումանյան փողոցի թիվ 17 հասցեի մոտակայքում «ԲՄՎ» մակնիշի 34 AA 055 համարանիշի ավտոմեքենան (վարորդ` 24-ամյա Ա. Ս.) բախվել է կայանված «Մերսեդես» մակնիշի 34 VM 760 համարանիշի ավտոմեքենային, իսկ վերջինս` «Նիսսան Մարչ» մակնիշի 34 LV 216 համարանիշի ավտոմեքենային, ինչից վարորդ՝ Ա. Ս.-ն եւ ուղեոր 24-ամյա Ռ. Մ.-ն մինչ հրշեջ-փրկարարների կանչի վայր հասնելը տեղի ուժերով դուրս են բերվել ավտոմեքենայից եւ տեղափոխվել «Սուրբ Գրիգոր Լուսավորիչ» ԲԿ եւ «Թիվ 1» համալսարանական հիվանդանոց:
Հրդեհը մեկուսացվել է ժամը 04.49-ին, մարվել` 04.54-ին:
Այրվել է «ԲՄՎ» մակնիշի ավտոմեքենայի բեռնախցիկը, սրահը եւ հետեւի երկու անվադողերն ամբողջությամբ:
Բժիշկները տուժածների առողջական վիճակը գնահատել են միջին ծանրության: