ՄԱԿ-ի Անվտանգության խորհուրդը դատապարտել է «Իսլամական պետություն» խմբավորման զինյալների կողմից բրիտանացի պատանդ Դեւիդ Հեյնսի սպանությունը, հաղորդում է Deutsche Welle-ի ռուսական ծառայությունը՝ վկայակոչելով AFP-ին:
«Հանցագործությունը կրկին ողբերգական կերպով ցույց տվեց՝ ինչպիսի լրջագույն վտանգների են ենթարկվում հումանիտար առաքելությունների աշխատակիցները Սիրիայում», - ասվում է ԱԽ-ի 15 անդամների կողմից միաձայն ընդունված հայտարարության մեջ:
«Անհրաժեշտ է վճռական պայքար մղել «Իսլամական պետության» խմբավորման դեմ, ԻՊ-ի շարունակվող բարբարոսական ակտերը չեն վախեցնում, այլ հակառակը՝ խորապես ամրացնում են ահաբեկչական խմբավորումների դեմ պայքարում համատեղ գործողությունների անհրաժեշտության համոզվածությունը», - ընդգծվում է փաստաթղթում:
Անվտանգության խորհուրդը ԻՊ-ից պահանջել է անհապաղ ազատ արձակել պատանդներին եւ բոլոր երկրներին կոչ է արել համագործակցել Մեծ Բրիտանիայի հետ, որը խոստացել է մեղավորներին պատասխանատվության ենթարկել:
Ինչպես արդեն հաղորդվել էր, հումանիտար առաքելության աշխատակից Դեւիդ Հեյնսին Սիրիայում առեւանգել էին ԻՊ-ի զինյալները: Սեպտեմբերի 14-ի գիշերը ԻՊ-ը համացանցում տեղադրել էր վերջինիս սպանության տեսանյութը եւ խոստացել եւս մեկ բրիտանացու՝ Ալան Հենինգին, մահապատժի ենթարկել: