Ժամկետային զինծառայող Լյուքս Ստեփանյանի սպանության համար 17 տարվա ազատազրկման դատապարտված Դավիթ Խաչատրյանի փաստաբանը դիմել է Վերաքննիչ դատարան, բողոքը կքննվի սեպտեմբերի 19-ին: Այս մասին NEWS.am-ի թղթակցի հետ զրույցում ասաց Դավիթ Խաչատրյանի փաստաբանը՝ Երեմ Սարգսյանը:
«Ընթացքը ցույց կտա, այսօր դժվար է պետական մարմինների վրա հույս դնել, այս գործով երեւաց, թե դատաքննությունը ինչ նպատակ էր հետապնդում: Չի բացառվում, որ վերաքննիչ դատարանի դատավորները ուժ գտնեն եւ օբյեկտիվ քննություն իրականցնեն, ավելի արդար որոշում կայացնեն»,-ասաց Երեմ Սարգսյանը:
Փաստաբանն ասաց, որ Վերաքննիչ դտարանից պահանջում են Դավիթ Խաչատրյանի արարքի վերաորակում, այսինքն՝ մեղադրանքի առաջադրում Քրեական օրենսգրքի 373-րդ հոդվածի 2-րդ եւ 3-րդ մասերի հատկանիշներով (զենքի, ռազմամթերքի եւ շրջապատի համար առավել վտանգ ներկայացնող առարկների, նյութերի հետ վարվելու կանոններ խախտելը, որը մարդու առողջությանն անզգուշությամբ պատճառել է ծանր վնաս եւ առաջացրել է մարդու մահ):
Ինչ վերաբերում է Դավիթ Խաչատրյանի առողջական վիճակին, ում վիրահատել էին սեպտեմբերի 1-ին, փաստաբանն ասաց, որ կարերն արդեն քանդել են, բայց այժմ նա նյարդային խնդիրներ ունի, գտնվում է «Դատապարտյալների հիվանդանոցում» եւ դրա ուղղությամբ բուժում է ստանում:
Նշենք, որ Դավիթ Խաչատրյանի մոտ ախտորոշվել է ողնաշարի կիստա, նաեւ սրտի աշխատանքի անբավարարություն:
Ավելի վաղ NEWS.am-ը հաղորդել էր, որ 2013թ. մայիսի 15-ին, ժամը 15:30-ի սահմաններում, ՀՀ ՊՆ N զորամասի պահակախմբի մուտքի դիտորդ, ժամկետային զինծառայող, շարքային, 19-ամյա Դավիթ Ռաֆայելի Խաչատրյանն իրեն ամրակցված ԱԿՄ տեսակի ինքնաձիգից կրակոց էր արձակել, ինչի հետեւանքով պահակախմբում ընդգրկված ժամկետային զինծառայող, շարքային Լյուքս Ստեփանյանը գլխի շրջանում ստացած հրազենային վիրավորումից տեղում մահացել էր, իսկ նույն զորամասի ժամկետային զինծառայող, շարքային Հրաչյա Վաղինակի Սարգսյանը գլխի շրջանում ստացել էր հրազենային վիրավորում: Դավիթ Խաչատրյանը դատապարտվել է 17 տարվա ազատազրկման։ Դավիթը ամբողջ դատավարության ընթացքում պնդել է, որ պատահաբար է կրակել։