«Հարսնաքարի» գործով դատապարտյալներ Նորայր Հայրապետյանի եւ Արման Խաչատրյանի փաստաբան Երեմ Սարգսյանը դիմել է Վճռաբեկ դատարան՝ բողոքարկելով առաջին ատյանի եւ Վերաքննիչ քրեական դատարանների որոշումները իր պաշտպանյալների մասով: Այս մասին NEWS.am-ի թղթակցի հետ զրույցում ասաց Երեմ Սարգսյանը:

Փաոտաբանն ասաց, որ պահանջում են արդարացնել Արման Խաչատրյանին, քանի որ միջադեպին նրա մասնակցության վերաբերյալ որեւէ հիմնավորում չկա: Իսկ Նորայր Հայրապետյանի մասով պահանջում են արարքի մասնավորեցում, քանի որ Քրեական օրենսգրքի 113-րդ 2-րդ մասով (դիտավորությամբ առողջությանը միջին ծանրության վնաս պատճառելը) հարուցված մեղադրանքը հիմնավոր չեն համարում: Ըստ փաստաբանի՝ որեւէ հիմք չկա վկայելու, որ Նորայր Հայրապետյանը մարմնական վնասվածք է պատճառել:

Ավելի վաղ NEWS.am-ը հայտնել էր, որ 2012թ. հունիսի 17-ին, ժամը 23:00-ի սահմաններում, այդ ժամանակ ՀՀԿ խմբակցության պատգամավոր, ՀՀ ֆուտբոլի ֆեդերացիայի նախագահ Ռուբեն Հայրապետյանին պատկանող «Հարսնաքար» համալիրում դաժանորեն ծեծի էին ենթարկվել մի քանի ռազմական բժիշկներ: Նրանցից մեկը՝ Վահե Ավետյանը, հունիսի 29-ին վախճանվել էր հիվանդանոցում՝ առանց գիտակցության գալու: Հարուցված քրգործով ամբաստանյալներ Արման Խաչատրյանին, Նորայր Հայրապետյանին, Գարիկ Մարգարյանին, Արման Բաղդասարյանին, Դավիթ Ադամյանին եւ Արթուր Բաբլոյանին առաջին ատյանի դատարանը մարտի 24-ին դատապարտեց 12-ական տարվա ազատազրկման։ Ամբաստանյալներն առաջին ատյանի դատարանի որոշումը փորձեցին բեկանել Վերաքննիչ քրեական դատարանում, սակայն դատարանն առաջին ատյանի որոշումն անփոփոխ թողեց։