Լեռնային Ղարաբաղի Հանրապետության վարչապետ Արա Հարությունյանն օրերս այցելել է ազատագրված Քարվաճառի շրջանի Նոր Էրքեջ գյուղ եւ հանդիպել ադրբեջանցի դիվերսանտների կողմից դաժանաբար սպանված 16-ամյա Սմբատ Ցականյանի ծնողներին: Վարչապետը հայտնել է, որ շուտով սկսվի դատավարությունը, որը հրապարակային է լինելու:
«Թե ինչ է եղել Սմբատ Ցականյանի հետ եւ ինչ փուլում է գործը, մեզ նորություններ չեն հայտնում, բայց վարչապետն ասաց, որ շուտով Ստեփանակերտում սկսվի դատավարությունը, որից բոլորս անհամբերությամբ ենք սպասում: Ամեն դեպքում, Ցականյանների ընտանիքը մշտապես իշխանությունների ուշադրության կենտրոնում է: Վարչապետն անձամբ ինձ հանձնարարել է, որ եթե ընտանիքը խնդիր ունենա, անպայման դիմենք նրանց»,- NEWS.am-ի հետ զրույցում ասաց Նոր Էրքեջ համայնքի ղեկավար Արա Հովհաննիսյանը:
Նրա խոսքով՝ ընտանիքը սպասում է դատավարության մեկնարկին՝ հասկանալու համար, թե իրականում ինչ է տեղի ունեցել եւ ինչպես են սպանել 16-ամյա երիտասարդին:
Նշենք, որ գործը հարուցվել է Քրեական օրենսգրքի 103-րդ հոդվածի 1-ին մասով, այն է՝ սպանությունը, ապօրինաբար մեկ ուրիշին կյանքից զրկելը:
Հիշեցնենք, որ հուլիսի 10-ին լուրեր էին տարածվել, որ ադրբեջանցի դիվերսանտները Քարվաճառի 17-ամյա մի բնակչի են գերեվարել, որին մի քանի օր շարունակ հարազատները գտնել չէին կարողանում: Հուլիսի 15-ին տղայի դին հայտնաբերել են, իսկ մեկ օր անց էլ հուղարկավորել նրան փակ դագաղով, հարազատներին թույլ չեն տվել նույնիսկ դիակը տեսնել: