Հայ բնապահպանները բազմիցս դիմել են Երեւանի քաղաքապետարանին, որ առանձնատների վերածված անտառների տարածքները վերադարձվեն բնակչությանը, սակայն ապարդյուն. հայ պաշտոնյաները շարունակում են շինարարություն իրականացնել՝ հատելով ծառերը: Այս փաստի վերաբերյալ այսօր՝ սեպտեմբերի 15-ին, իր մտահոգությունը հայտնեց բնապահպան Կարինե Դանիելյանը:
«Մոնումենտից մինչեւ Սարի թաղ բոլոր անտառները վերացրել են, հիմա միայն վիլլաներ կան: Բազմիցս դիմել ենք քաղաքապետարանին, նույնիսկ օլիգարխներին ենք դիմել, որ բարի կամք դրսեւորեն եւ անտառները վերադարձնեն ժողովրդին: Քաղաքապետը, վարչապետը եւ ուրիշ շատ պաշտոնյաներ այնտեղ տներ են սարքել»,- ասաց նա:
Բնապահպանի կարծիքով՝ Հայաստանը մնացել է առանց բնության, իսկ գլխավոր խնդիրն այն է, որ ամբողջ երկիրը վերածվել է աղբանոցների եւ շենքերի:
«Ամբողջ Հայաստանն ուղղակի աղբի մեջ կորած է: Սա ցուցանիշ է, թե ինչպես է բնակչությունն ու իշխանությունները վերաբերվում բնությանը: Հույս ունենք, որ այն շուտով կլուծվի: Բացի դրանից՝ բնության համար ազատ տեղ չկա. Որ կողմ նայում ես, շինարարություն է ընթանում, որ պողոտայով մտնում ես, շինարարություն է կատարվում»: