Ղազախստանի մայրաքաղաք Աստանայում ընթանում է Ընկերվար Միջազգայնականի (Սոցինտերն) ԱՊՀ, Կովկասի եւ Սեւծովյան հանձնախմբի հերթական ժողովը, որին մասնակցում է նաեւ ՀՅԴ-ն:

Ժողովին մասնակցում են ներկայացուցիչներ Մոլդովայի, Բելառուսի, Ուկրաինայի, Ռուսաստանի, Ղազախստանի, Հայաստանի, Տաջիկստանի, Ադրբեջանի եւ Հունգարիայի կուսակցություններից։ Ներկա է նաեւ Ընկերվար Միջազգայնականի գլխավոր քարտուղար Լուիս Այալան։

Ժողովի մասնակից ՀՅԴ պատվիրակության կազմում են ՀՅԴ Հայաստանի Գերագույն Մարմնի ներկայացուցիչ Արմեն Ռուստամյանը, ով համանախագահում է նիստը,  եւ ՀՅԴ Բյուրոյի Հայ Դատի եւ քաղաքական հարցերի գրասենյակի պատասխանատու Կիրո Մանոյանը։ Ժողովի մյուս համանախագահն է Ալեքսանդրա Դոբոլին (Հունգարիա):

Ժողովին ողջույնի խոսքով հանդես է եկել Ղազախստանի Համազգային Ընկերվար Ժողովրդավար կուսակցության ղեկավար Ժարմախան Տույաքբայը (Zharmakhan Tuyakbay)։

Ժողովի առաջին օրակարգը վերաբերվում է տարածաշրջանում հակամարտություններին եւ խաղաղության որոնման ճիգերին։ Գլխավոր թեման Ուկրաինայում իրադարձություններն են։ Ելույթ են ունեցել Ուկրաինայի Ընկերվար Ժողովրդավար, «Արդար Ռուսաստան», ՀՅԴ (Արմեն Ռուստամյան) եւ այլ կուսակցությունների ներկայացուցիչները։

Ընկերվար Միջազգայնականը (Socialist International) ընկերվար-ժողովրդավարական, ընկերվարական եւ աշխատավորական կուսակցություններ համախմբող համաշխարհային կառույց է։ Այն համախմբում է բոլոր մայրցամաքներից ավելի քան 140 երկրների 170 քաղաքական կուսակցություններ եւ կազմակերպություններ։

ԱՊՀ երկրների կուսակցություններից ՀՅԴ-ն լիիրավ անդամի կարգավիճակ ունեցող առաջին կուսակցությունն է։ ՀՅԴ Բյուրոյի անդամ Մարիո Նալբանդյանը փոխնախագահ է, իսկ ՀՅԴ Բյուրոյի անդամ Վահան Հովհաննիսյանը՝ ԱՊՀ, Կովկասի եւ Սեւծովյան երկրների հանձնախմբի համանախագահ։ ՀՅԴ համապատասխան կառույցները լիիրավ անդամ են Կանանց Ընկերվար Միջազգայնականին (SIW) եւ Ընկերվար Երիտասարդների Միջազգային Միության (IUSY)։