Հրանտ Դինքն առաջինն էր, որ աղաղակեց Հայոց Ցեղասպանության մասին եւ հայ եւ թուրք ժողովուրդներին սովորեցրեց հասկանալ միմյանց: Ստամբուլահայ հայտնի հասարակական գործիչ, լրագրող, հայկական «Ակոս» շաբաթաթերթի նախկին խմբագիր Հրանտ Դինքն այսօր կդառնար 60 տարեկան,  նրա գործընկեր, պարբերականի հայերեն էջերի խմբագիր Բագրատ Էստուկյանը NEWS.am-ի հետ զրույցում խոսել է Դինքի մասին՝ որպես անձ, հասարակական գործիչ եւ խմբագիր:

Պարոն Էստուկյան, այսօր Հրանտ Դինքը կդառնար 60 տարեկան: Ապրելով եւ գործելով Թուրքիայում՝ նա անընդհատ բարձրաձայնում էր Հայոց Ցեղասպանության ճանաչման հարցը: Արդյո՞ք նրա կատարած աշխատանքը գնահատվեց:

Որպես հասարակական գործիչ՝ բոլորս էլ հասկանում ենք, որ Հրանտ Դինքին նահատակությունից հետո սկսեցին հասկանալ եւ գնահատել: Հրանտ Դինքը միշտ էլ խոսք էր հղում թուրք եւ հայ ժողովրդին, սակայն այդ խոսքը երբեք այնքան լավ չէր գնահատված, քան 2007թ.-ից հետո: Նա երկու երկների ժողովուրդներին սովորեցրեց հասկանալ միմյանց. Հայաստանում եւ Թուրքիայում ծանր կարծրատիպեր կային միմյանց նկատմամբ, Դինքը նրանց ստիպեց հասկանալ եւ ընդունել, որ ժողովուրդն ուրիշ է, իշխանությունը՝ ուրիշ: Հրանտը Թուրքիայի բարեկամն էր, բայց միեւնույն ժամանակ Ցեղասպանության պահանջատերն էր: Նախկինում Թուրքիայի հայությունը նախընտրում էր զուսպ լինել, իսկ Հրանտն առաջինն էր, որ խոսեց Ցեղասպանության, պահանջատիրության մասին:

Հրանտ Դինքը մեծացել է որբանոցներում՝ առանց ծնողական խնամքի: Ինչքանո՞վ էր այս փաստն անդրադարձել նրա անձնային որակների վրա:

Ճիշտ եք, Հրանտը, պայմաններից ելնելով, որբ էր մեծացել, մանկությունը որբանոցներում էր անցել, այդ պատճառով մինչեւ կյանքի վերջ՝ օգնեց թույլերին, տկարներին, իրենից փոքրերին, Հրանտը բոլորին էր պաշտպանում:

Պարոն Էստուկյան, իսկ ինչպիսի՞ն էր Հրանտ Դինքն աշխատավայրում, ի՞նչ հարաբերություններ ուներ իր աշխատողների հետ:

Խմբագիր Հրանտ Դինքի մասին խոսելիս չեմ կարող չանդրադառնալ այն փաստին, որ իր շնորհիվ հենց «Ակոս»-ի շենքում բացվեց դպրոց, որտեղ առայսօր երեխաներ են սովորում: Սա եզակի թերթ է, որտեղ դպրոց էլ է գործում: Հրանտը շինիչ մարդ էր, երբեք չէր ուզում որեւէ մեկին վիրավորվել, մարդկանց համոզում էր եւ իր ուզած արդյունքները ստանում, համառորեն պնդում էր եւ հաջողության հասնում: Անհնար էր չմտերմանալ նրա հետ, մտերմություն ստեղծող մարդ էր:

Ամեն տարի, «Ակոս»-ը հենց այսօր մրցանակներ է հանձնում մարդու իրավունքների համար պայքարող մարդկանց: Ի՞նչ եք պատրաստվում այսօր անել:

Ինչպես միշտ այսօր էլ երեկոյան դահլիճում հատուկ միջոցառում ունենք որի ժամանակ էլ կպարգեւատրենք հատուկ մարդկանց: Բացի դրանից՝ երաժշտական ծրագիր է լինելու, հատուկ հյուրեր ունենք:

Հիշեցնենք, որ Հրանտ Դինքը սպանվել է «Ակոս» խմբագրության դիմաց 2007 թվականի հունվարի 19-ին: Նրա սպանության գործով դատը Թուրքիայում տեղի ունեցած բազմաթիվ ամոթալի դատական գործերից մեկն է: Սպանության գործով անչափահասների համար նախատեսված դատարանում 25 տարվա ազատազրկման դատապարտվեց Օգյուն Սամասթը, որը որոշակի արտոնություններից օգտվելով` կարող է 10 տարի անց հայտնվել ազատության մեջ: Մյուս ազատազրկման դատապարտվածը Յասին Հայալն է, ում դատարանը ցմահ է տվել: Թեեւ դատավարության ժամանակ մի շարք սկանդալային վկայություններ եղան, որոնք ապացուցում էին, որ Դինքի սպանության մասին նախօրոք տեղյակ են եղել ոստիկանությունն ու ժանդարմերիան, սակայն ոչ ոք լուրջ պատիժ չկրեց դրա համար: Ավելին, Դինքին սպանած Օգյուն Սամասթի հետ Թուրքիայի դրոշով նկարված թուրք ոստիկանի պաշտոնը բարձրացվեց:

Զրուցեց Աիդա Հովհաննիսյանը