Թուրքիայի ԵՄ-ի հարցերով նախարար Վոլքան Բոզքըրը հայտարարել է, որ Թուրքիան իր լուման է ներդրել Հայաստանի հետ հարաբերությունների առաջխաղացման գործում:
Լիսաբոն իր այցի ընթացքում` նախարարն անդրադարձել է հայ-թուրքական հարաբերությունների կարգավորմանը, գրում է թուրքական «Sabah»-ը: Նա հատկապես ընդգծել է նախագահ Ռեջեփ Թայիփ Էրդողանի նամակի կարեւորությունը, որոմ վերջինս ցավակցել էր հայերին` ապրիլի 24-ի նախօրեին:
«Այդ նամակով մենք ցույց տվեցինք, որ թերթում ենք սրտաճմլիկ իրադարձությունների էջը եւ խաղաղության ձեռք պարզում: Եթե մեր գործընկերները սեղմեն այն, մենք կկարողանանք նոր էջ բացել: Չի կարելի ապագա շարժվել ատելությամբ», - հայտարարել է Բոզքըրը:
Նախարարը հույս է հայտնել, որ երկու երկրների ապագան կառուցվելու է փոխադարձ հանդուրժողականությամբ: «Այսուհետ բոլորը պետք է խաղաղ ապրեն եւ մոռանան անցյալի միջադեպերը: Մենք` որպես Թուրքիայի Հանրապետություն, մեր լուման ներդրել ենք», - ընդգծել է նա` «մոռանալով» հիշատակել, որ հայ-թուրքական արձանագրությունները սառեցվել են` Անկարայի կողմից Ղարաբաղի հիմնախնդրի վերաբերյալ նախապայմաններ մտցնելու պատճառով:
