«Վերնիսաժում» մայիսի 17-ին հնչած կրակոցների գործով կալանավորված Վալերի Հովհաննիսյանի փաստաբանը փոխվել է: Այս մասին NEWS.am-ին ասաց մեղադրյալի արդեն նախկին պաշտպան Լեւոն Բաղդասարյանը:
«Անցած շաբաթ ես լուծարել եմ պայմանագիրս Վալերի Հովհաննիսյանի հետ: Պատճառների մասին հիմա եկեք չխոսենք: Նախաքննությունը թող ավարտվի, այդ ժամանակ խնդրեմ, կպատասխանեմ բոլոր հարցերին»,- ասաց նա:
Թե ով է նոր փաստաբանը, Լեւոն Բաղդասարյանը չգիտեր:
Հիշեցնենք, որ ըստ նախնական վարկածի՝ Ներսես Մելքոնյանն ու նրա ընկեր Վալերի Հովհաննիսյանը մայիսի 17-ին՝ ժամը 13:30-ի սահմանում, «Վերնիսաժի» մոտ վեճի են բռնվել Գոռ Առաքելյանի հետ եւ բռնություն կիրառել նրա նկատմամբ, հնչել են կրակոցներ, 5 մարդ վիրավորվել էր, այդ թվում՝ Ներսես Մելքոնյանն ու նրա ընկեր Վալերի Հովհաննիսյանը, նաեւ պատահական անցորդներ: ԱԺ ԲՀԿ-ական պատգամավոր Կարո Կարապետյանի փեսան՝ Գոռ Առաքելյանը, մայիսի 18-ին ինքնակամ ներկայացել էր ոստիկանություն: Նրա դեմ մեղադրանք է առաջադրվել սպանության փորձ կատարելու համար եւ երկամսյա նախնական կալանք է սահմանվել։ Հունիսի 9-ին կալանավորվել էր նաեւ Ներսես Մելքոնյանը, նրան մեղադրանք է առաջադրվել խուլիգանություն կատարելու համար: Նույն մեղադրանքով կալանավորվել է նաեւ Վալերի Հովհաննիսյանը։
