ՆԱՏՕ-ի գլխավոր քարտուղար Անդերս Ֆոգ Ռասմուսենը Ռուսաստանին ու իսլամական ահաբեկիչներին անվանել է Դաշինքի համար գլխավոր սպառնալիքները: Նրա խոսքով, ՆԱՏՕ-ի անդամները պետք է միասնաբար դիմակայեն արեւմտյան աշխարհի դեմ միաժամանակ ծառացած սպառնալիքներին. Ռուսաստանի եւ «Իսլամական պետության» կողմից:
ՆԱՏՕ-ի գլխավոր քարտուղարի պաշտոնում հրաժեշտի ելույթի ընթացքում Ռասմուսենը հայտարարել է, որ Դաշինքը հայտնվել է աշխարհաքաղաքական բաժանման առաջին գծում՝ «հանդուրժողականության եւ ֆանատիզմի», «ժողովրդավարության եւ տոտալիտարիզմի» միջեւ: «Մենք պետք է ամուր կանգնենք որպես ազատության պաշտպաններ»,- ասել է Ռասմուսենը:
Նա հավելել է, որ ՆԱՏՕ-ի անդամ երկրները պետք է խոստովանեն այն փաստը, որ իրենց առջեւ կանգնած երկու նոր սպառնալիքները կարող են այդպիսիք մնալ դեռ երկար տարիներ: Ռասմուսենն ընդգծել է նաեւ, որ ՆԱՏՕ-ն պետք է պատրաստ լինի ռազմական ուժ կիրառել եւ քաղաքական կամք դրսեւորել, երբ դա անհրաժեշտ լինի:
Անդրադառնալով Ռուսաստանի կողմից սպառնալիքին՝ ՆԱՏՕ-ի գլխավոր քարտուղարն ասել է, որ Վլադիմիր Պուտինի նախագահության տարիներին Ռուսաստանը «ոտնակոխ է արել բոլոր կանոններն ու պարտավորությունները», որոնք Եվրոպայում խաղաղություն էին պահպանում սառը պատերազմի ավարտից հետո: