«Ժառանգության» անդամներ, պատգամավորներ Ռուբիկ Հակոբյանի եւ Զարուհի Փոստանջյանի վիճաբանության մասին լուրերն իրականությանը չեն համապատասխանում: «Ժառանգության» մամուլի խոսնակ Դավիթ Սանասարյանը NEWS.am-ի թղթակցի հետ զրույցում ասաց, որ «Ժառանգությունում» միշտ բանավեճեր լինում են եւ դրանց շնորհիվ է, որ »Ժառանգությունն» այսօր մնացել է քաղաքական դաշտում: «Բանավեճերը բավականին առողջացնում են ներքին մթնոլորտը եւ որոշումներ կայացնելու վրա մեծ ազդեցություն են ունենում: Զարուհի Փոստանջյանի եւ Ռուբիկ Հակոբյանի միջեւ ոչ մի վիճաբանություն չի եղել, դա բամբասանք է»,-ասաց մամուլի խոսնակը:
Նշենք, որ «Իրավունք» թերթը գրել է, որ ըստ «Ժառանգությանը» մոտ կանգնած աղբյուրի` այնտեղ բավականին թեժացել է վեճը խմբակցության ղեկավար Ռուբիկ Հակոբյանի եւ ԱՄՆ-ից վերադարձած Զարուհի Փոստանջյանի միջեւ: Փոստանջյանը մշտապես անհարմար վիճակներ է ստեղծում` դաժանաբար քննադատելով «քառյակին», գումարած դրան էլ, պնդում է, որ կուսակցությունը պետք է դեմ լինի ցանկացած սահմանադրական բարեփոխմանը եւ կիսի ԼՏՊ-ի այն տեսակետը, որ սահմանադրական հանրաքվեն պետք է վերածել «ռեժիմի հեռացմանը»: Սակայն Ռուբիկ Հակոբյանն ավելի հակված է փոքր-ինչ առավել կառուցողական մոտեցումներին, առավել եւս, որ ԲՀԿ առաջնորդն իր հարցազրույցում զգալիորեն հանել է սահմանադրական փոփոխությունների նկատմամբ կատեգորիկ ժխտական մոտեցումը, եւ անգամ ԲՀԿ օսկանյանական թեւը ստիպված է կրկնել, որ իրենք դեմ չեն բարեփոխմանը, իրենք դեմ են դեռ չհրապարակված փաթեթի գովաբանմանը»: