Վարչապետ Հովիկ Աբրահամյանն ընդունել է Հայաստանում Էստոնիայի արտակարգ եւ լիազոր դեսպան Պրիիտ Տուրկին: Ողջունելով դեսպանին կառավարությունում՝ վարչապետը նշել է, որ Հայաստանը կարեւորում է Էստոնիայի հետ հարաբերությունների հետագա զարգացումն ու ընդլայնումը: «Առկա է երկկողմ համագործակցության խորացման մեծ ներուժ: Վստահ եմ, որ համատեղ ջանքերով՝ բիզնես ֆորումների, փոխադարձ այցելությունների միջոցով կկարողանանք զարգացնել երկկողմ հարաբերությունները տնտեսության եւ այլ բնագավառներում»,- նշել է Հովիկ Աբրահամյանը:
Շնորհակալություն հայտնելով ընդունելության համար՝ դեսպանն ընդգծել է, որ իր երկիրը նույնպես մեծ նշանակություն է տալիս Հայաստանի հետ կապերի զարգացմանը: Պրիիտ Տուրկի խոսքով՝ Հայաստանն էական առաջընթաց է գրանցել բիզնես ոլորտի զարգացման գործում, ինչը նոր խթան է առեւտրատնտեսական բնագավառում երկկողմ ծրագրերի իրականացման գործում:
Այնուհետեւ զրուցակիցները քննարկել են Հայաստան-Եվրամիության հարաբերությունների զարգացմանն առնչվող հարցեր: Հովիկ Աբրահամյանը նշել է, որ մեր երկիրը կարեւորում է ԵՄ-ի աջակցությամբ շարունակելու ժողովրդավարության ամրապնդման, մարդու իրավունքների պաշտպանության, քաղաքացիական հասարակության զարգացման ուղղությամբ հետեւողական քայլերը:
Կողմերն անդրադարձել են նաեւ տարածաշրջանային խնդիրներին, մասնավորապես ղարաբաղյան հակամարտությանը, ընդգծելով, որ այն պետք է կարգավորվի ԵԱՀԿ Մինսկի խմբի շրջանակում խաղաղ բանակցությունների միջոցով: