ԵԿՄ վարչության նախագահ, գեներալ Մանվել Գրիգորյանը դեմ է, որ Քարվաճառի շրջանում հուլիսի 15-ին 16-ամյա Սմբատ Ցականյանին սպանած ադրբեջանցի դիվերսանտներին դատեն որպես հանցագործների. նրանց պետք էր սպանել։ NEWS.am-ի հարցին, թե, այնուամենայնիվ, քանի տարվա ազատազրկման են արժանի դիվերսանտները՝ հաշվի առնելով, վերջերս ադրբեջանական գերության մեջ դաժանաբար սպանված Կարեն Պետրոսյանի դեպքը, գեներալը պատասխանեց. «Էս հարցը պետք է տայիք դեռ այն ժամանակ, երբ իրեն բռնեցին, եթե ես բռնողը լինեի, հիմա ցխած, սպանած կլինեի։ Ի՞՚նչ դատավարություն, ի՞նչ դատական գործ։ Պետք էր դրանց վերացնել»։
Նշենք, որ Սմբատ Ցականյանի գործն այս պահին քննվումէ ԼՂՀ Ազգային անվտանգության ծառայությունում։ Նախաքննությունը շուտով կավարտվի, իսկ դատավարությունը լինելու է հրապարակային եւ քննվելու է Ստեփանակերտում։
Հիշեցնենք, որ հուլիսի 10-ին Քարվաճառ ներթափանցած ադրբեջանցի 3 դիվերսանտները առեւանգել եւ սպանել էին 16-ամյա Սմբատ Ցականյանին։ Ադրբեջանցի դիվերսանտներից մեկն այնուհետեւ ոչնչացվեց, երկուսը ձերբակալվեցին։
Նշենք, որ գործը հարուցվել է Քրեական օրենսգրքի 103-րդ հոդվածի 1-ին մասով, այն է՝ սպանությունը, ապօրինաբար մեկ ուրիշին կյանքից զրկելը: