Թեժ աշնան համար սառը ցնցուղներ խոստացող ոստիկանապետ Վլադիմիր Գասպարյանի այս խոսքերը նրա՝ գրականության հանդեպ ունեցած սիրո արգասիքն է: Այս մասին NEWS.am-ի թղթակցի հետ զրույցում ասաց Մարդու իրավունքների նախկին պաշտպան Լարիսա Ալավերդյանը:
«Դա Վլադիմիր Գասպարյանիъ գրականության հանդեպ սիրո արգասիք է, ինքը սիրում է գեղեցիկ կամ ինչ-որ ձեւով արտահայտվել: Թեժ աշնանը որեւէ մարմին ոչ թե պետք է սառը ցնցուղով հանդես գա, այլ պետք է լինի ուշադիր, հասկանա ու հնարավորինս օժանդակի, որ հասարակական պահանջարկը հնարավորինս ապահովվի»,-ասաց նա:
Ինչ վերաբերում է մարտի 1-ին՝ Վլադիմիր Գասպարյանի Կառավարության շենքը պահպանելուն եւ այդ դեպքերին առնչություն չունենալուն՝ Լարիսա Ալավերդյանն ասաց, որ եթե նա որպես ռազմական ոստիկանության պետ ստացել է հրաման, պետք է կատարի, բայց իր հրաման կատարելը մարտի 1-ին պարտադիր չէ, որ առնչություն կերպ մեկնաբանվի: «Բոլորովին այլ է, որ բոլորը պետք է իրենց պատասխանատվությունը զգան այն պարզ պատճառով, որ մինչեւ այսօր այդպես էլ չի պարզվել հիմնական սպանությունները: Կառավարությունը լիարժեք կրում է պատասխանատվություն մինչ այսօր, Վլադիմիր Գասպարյանը եւս կարող է հանդես գալ այնպիսի նախաձեռնությամբ, որը վերջապես կբերի հարցի լուծման»,-ասաց նա:
Մարդու իրավունքների նախկին պաշտպանը, անդրադառնալով Շանթ Հարությունյանի եւ նա որդու՝ Շահեն Հարությունյանի դատավարությանը, ասաց, որ ցավում է նրանց այդ իրավիճակում հայտնվելու համար, եւ ամեն ինչ պետք է արվեն, որ նրանց գտնվելու վայրում ապահովվի բոլոր իրավունքները եւ համայն իրավաբանական ուժերը ներդրվեն, որ եթե հնարավոր է ինչ-որ բան վերանայել, շտկել, ապա անպայման անել:
Ինչ վերաբերում է Մարտի 1-ին, նա նշել էր հետեւյալը.«Ես որպես էն ժամանակ ռազմական ոստիկանության պետ, հիմա որպես ոստիկանության պետ, ուղղակի չեմ զբաղվել այդ գործով: Մարտի մեկին իմ մասնակցությունը եղել է այնքանով, որ ռազմական ոստիկանությունը կառավարության շենքի պահպանությունն է վերցրել իր վրա, եւ ես օպերատիվ խմբով արդեն դեպքի վայրից հետո տեղազննություններին մասնակցել ենք նույնպես: Քննության ընթացքի հետ ես ուղղակի ծանոթ չեմ, եւ կարծում եմ՝ այնքան ծեծված թեմա է. ես ինչ էլ ասելու լինեմ, ասելու եմ այն, ինչ որ կան լրատվամիջոցներում»:
