Ճանապարհային երթևեկության կանոնների խախտման համար մինչեւ այժմ եղած տուգանքների համաներում պահանջող եւ կարմիր գծանշանների դեմ պայքարող «Դուրս մեր գրպանից» քաղաքացիական նախաձեռնությունը սեպտեմբերի 17-ին մայրաքաղաքի վճարովի ավտոկայանատեղիներում ցուցադրական բողոքի ակցիա կանցկացնի: Այս մասին այսօր՝ սեպտեմբերի 16-ին, լրագրողների հետ հանդիպմանն ասացին նախաձեռնության անդամները՝ տեղեկացնելով, որ ակցիան կմեկնարկի Մերգելյան ինստիտուտի տարածքից, ժամը 14:00-ին:
«Որոշել ենք ցուցադրական գնանք, կանգնենք կարմիր գծերում, 15 րոպեից ավելի մնանք ու չվճարենք: Սպասելու ենք, որ համապատասխան տուգանքներ գան մեզ վրա, որ բողոքարկենք դատարանում, ապացուցենք, որ կարմիր գծերն անօրինական դաշտում են գործում»,-ասաց նախաձեռնության անդամ Արմեն Միքայելյանը:
Արմեն Միքայելյանի խոսքով՝ մոտ 15 վարորդ վճարովի ավտոկայանատեղիների տուգանքները վերացնելու պահանջով արդեն դիմել է քաղաքապետարան, որն էլ բավարարել է նրանց պահանջը:
Արմեն Միքայելյանը տեղեկացրեց, որ իրենց նախաձեռնության անդամները մինչեւ այժմ կարմիր գծերի տարածքում 15 րոպեից ավելի կանգնելու ու չվճարելու դեպքում չեն տուգանվել:
«Եթե օրենքը կա, պետք է գործի բոլորի համար: Ուրեմն իրենք հստակ գիտեն՝ մենք գիտենք օրենքի բոլոր գաղտնիքները: Դրա համար մենք վաղը կայանալիք ակցիայով ցանկանում ենք մյուս քաղաքացիներին եւս տեղեկացնել իրենց իրավունքների մասին եւ ցույց տալ, որ մենք տեր ենք կանգնում մեր իրավունքներին»,-ասաց Արմեն Միքայելյանը:
Ինչպես նշեցին նախաձեռնության անդամները՝ կարմիր գծերի «թակարդն» ընկնողներն ամենից շատ մարզերից մայրաքաղաք եկած վարորդներն են, որոնք գրեթե տեղեկացված չեն դրանց գոյության մասին: Հենց նրանց տեղեկացնելու, իրենց իրավունքներին տեր կանգնելու հորդորով էլ նախաձեռնությունը սեպտեմբերի 7-ին Կոտայքի և Գեղարքունիքի մարզերում իրազեկման ավտոերթ էր անցկացրել, որը, ըստ Արմեն Միքայելյանի, հասել է իր նպատակին. «Մարզերում քչերն էին տեղեկացված, բայց ոչ մի բացասական արձագանք չստացանք: Երեւանում, երբ, օրինակ, թռուցիկներ ենք բաժանում, մարդկանց մոտ անտարբերություն, արհամարհական վերաբերմունք կա, բայց մարզերում բուռն արձագանք կար, իրենք էին մոտենում, հարցեր տալիս, թռուցիկներ վերցնում»:
«Դուրս մեր գրպանից» նախաձեռնության անդամները, որոնց հիմնական պահանջները տուգանքների նվազեցումից հետո մնացել են եռապատկված տուգանքների նկատմամբ համաներում սահմանելն ու կարմիր գծերի վերացումը, կշարունակեն պայքարը, հաջորդ ավտոերթերը կլինեն մյուս մարզերում: