Ոչ իշխանական ուժերի քառյակից հարկ է հատուկ առանձնացնել սահմանադրական բարփոխումների վերաբերյալ ՀՅԴ-ի դերքորոշումը: Այդ մասին այսօր՝ սեպտեմբերի 16-ին, լրագրողներին հայտարարեց Հանրապետական խմբակցության պատգամավոր Արտակ Դավթյանը:
Նրա խոսքով՝ չի կարելի չգնահատել ՀՅԴ-ի կառուցողականությունը, որն, ի տարբերություն մնացած երեք կուսակցությունների («Ժառանգություն», ԲՀԿ, ՀԱԿ) «կուրորեն» չի քննադատում սահմանադրական բարեփոխումների հայեցակարգը: «Փորձագիտական խումբն ավարտին է հասցնում հայեցարգի հետ կապված աշխատանքները, այն պատրաստ կլինի հոկտեմբերին: Այդժամ այն կքննարկեն լայն շրջանակներում՝ ամենատարբեր քաղաքական ուժերի ներկայացուցիչների մասնակցությամբ», - հավելեց Դավթյանը:
Նրա կարծիքով, եթե բարեփոխումերից հետո Հայաստանը անցում կատարի կառավարման խորհրդարանական համակարգին, (նախագահական-խորհրդարանական խառը ձեւին) ապա ժողովրդավարությունը չի տուժի: «Խորհրդարանական համակարգով շատ երկրներ գիտեմ, սակայն ոչ մեկը չի առանձնանում թույլ ժողովրդավարությամբ: Միեւնույն ժամանակ գիտեմ ավտորիտար ռեժիմներով բազմաթիվ նախագահական հանրապետություններ, օրինակ աֆրիկյան երկրների մեծ մասը», - եզրափակեց Դավթյանը:
