Սերժ Սարգսյանը մինչեւ առաջիկա նախագահական ընտրություններն արդեն հեռացված կլինի զբաղեցրած պաշտոնից։ Այսօր՝ սեպտեմբերի 16-ին, այսպիսի համոզմունք հայտնեց Հայ ազգային կոնգրեսի մամուլի խոսնակ Արման Մուսինյանը։
Նրա պնդմամբ՝ Սերժ Սարգսյանը շատ շուտով ստիպված կլինի հեռանալ. «Քաղաքականության մեջ լինելու է հստակ բաժանում։ Նրանք, ովքեր կկանգնեն Սերժ Սարգսյանի կողքին որեւէ պատրվակով, կհայտնվեն քաղաքական աղբանոցում։ Նրանք, ովքեր կկանգնեն ժողովրդի կողքին, իրենք կլինեն Սերժ Սարգսյանի իշխանությունից ազատ Հայաստանում առաջատար քաղաքական ուժեր։ Կարծում եմ, որ մենք առաջիկա ամիսներին կունենանք նոր որակ քաղաքական իրավիճակում»։
Հարցին, թե այդ առաջատար ուժը լինելու է քառյակը, Մուսինյանը պատասխանեց. «Ինչո՞ւ միայն քառյակը, ի վերջո Հայաստանում կան շատ քաղաքական ուժեր, կա իշխող կուսակցություն»։
Թե երբ է լինելու այդ իշխանափոխությունը, ՀԱԿ մամուլի խոսնակը պատասխանեց. «Շուտով սկսվի այդ ժամանակը, համբերատար եղեք եւ սպասեք, համբերատար եղեք»։