Շիրակի մարզի դատախազի տեղակալ Արմեն Շիրոյանն այսօր՝ սեպտեմբերի 16-ին, կայցելի «Վանաձոր» քրեակատարողական հիմնարկ՝ տեղեկանալու, թե ինչու է հացադուլի մեջ գտնվող ամբաստանյալ Տիգրան Մելիքյանը ցանկություն հայտնել տեսնել իրեն ու ինչն է նրան ստիպել հացադուլ անել:
«Ես հենց այսօր կգնամ նախ տեղեկանալու նրա առողջականի մասին, քանի որ հացադուլի մեջ է, եւ վերջապես իմանամ, թե ինչ է պատահել»,- NEWS.am-ի հետ զրույցում ասաց Արմեն Շիրոյանը:
Դատախազի խոսքով՝ ինքը Տիգրան Մելիքյանի անունից որեւէ նամակ չի ստացել, իսկ հացադուլի մասին տեղեկացել է NEWS.am-ի հրապարակումից:
Հիշեցնենք, որ Տիգրան Մելիքյանն արդեն 10 օր գտնվում է հացադուլի մեջ եւ պահանջում է հանդիպում դատարանում իր գործով դատախազ, ՀՀ Շիրակի մարզի դատախազի տեղակալ Արմեն Շիրոյանի հետ:
Նշենք, որ Տիգրան Մելիքյանին առաջադրվել է մեղադրանք Ք.Օ 104 հոդվածի հատկանիշներով. նա մեղադրվում է 2013թ. մայիսի 15-ին գրող Հրանտ Մաթևոսյանի եղբորորդու` Մոտկորի անտառապետ Թովմա Մաթևոսյանի սպանության մեջ: Այդ ժամանակ Տիգրան Մելիքյանը ՀՀ բնապահպանության նախարարության աշխատակազմի բնապահպանական պետական տեսչության Լոռու տարածքային բաժնի տեսուչն էր։ Նա արդեն 18 ամսի կալանավորված է։