Վերջին 10 տարիների ընթացքում աշխարհում սովյալների թիվը մոտ 100 մլն մարդով կրճատվել է, սակայն մինչեւ օրս մոլորակի յուրաքանչյուր 9-րդ բնակիչ կամ մոտ 805 մլն մարդ տառապում է թերսնումից, հետեւում է սեպտեմբերի 16-ին հրապարակված ՄԱԿ-ի զեկույցից:
Զեկույցում նշվում է, որ տվյալ պահին 63 զարգացող երկրներ արդեն հասել են սովյալների մասնաբաժնի կրկնակի անգամ նվազեցնելու առաջադրված նպատակին, եւս 6 երկիր այդ ցուցանիշին կհասնեն արդեն 2015թ.-ին, փոխանցում է NEWSru.com-ը:
Փաստաթղում նաեւ ընդգծվում է, որ սովյալների թվաքանակի արագացված կրճատումը հնարավոր է միայն «ամուր քաղաքական կամքի շնորհիվ»: Զեկույցի հեղինակները համոզված են, որ թերսնումից տառապող մարդկանց թվաքանակի կրճատումը պայմանավորված է «ազգային խնդիրների ճիշտ ըմբռնմամբ» եւ «քաղաքականության համապատասխան տարբերակների մշակմամբ»:
ՄԱԿ-ի մասնագետների կանխատեսումներով՝ 2030թ. Երկրի բնակչության թվաքանակը կկազմի 10 մլրդ մարդ: Կազմակերպությունը նախազգուշացնում է, որ բնակչությանը ապրանքներով ապահովելու անհրաժեշտությունը կարող է հանգեցնել ջրային ռեսուրսների սպառմանը եւ անտառահատմանը:
