Հայաստանում սահմանադրական ճգնաժամ չկա, իսկ սահմանադրական բարեփոխումներն ուղղված են երկրի քաղաքական համակարգի կերպափոխմանը: Այդ մասին այսօր՝ սեպտեմբերի 16-ին, սահմանադրական բարեփոխումների քննարկման ժամանակ հայտարարեց «Հանրապետական» պատգամավորական խմբակցության պատգամավոր Կորյուն Նահապետյանը:
Նրա խոսքով՝ սահմանադրական բարեփոխումներ կատարելու ամենահարմար ժամանակահատվածն է, քանի որ գործընթացն հիմնվում է երկրի հասարակական–քաղաքական իրականությունների, համակարգային փոխակերպումներ անցկացնելու, մարդու իրավունքների եւ ազատությունների երաշխիքների ապահովման վրա:
Պատգամավորն ընդգծեց, որ այսօր համընդհանուր ուշադրությունը կենտրոնացված է կառավարման խորհրդարանական համակարգի անցմանը, մինչդեռ հայեցակարգը բազմաթիվ այլ ասպեկտներ է պարունակում, ինչպես օրինակ, պարտադիր բժշկական ապահովագրությունը, դատական իշխանության անկախության ապահովումը, իշխանության բոլոր ճյուղերի արդյունավետ տարանջատումը: Նահապետյանի գնահատմամբ՝ սահմանադրական բարեփոխումները երկրի քաղաքացիների կյանքում ճակատագրական փոփոխություններ կապահովեն:
