Վիկտոր Համբարձումյանի անվան միջազգային գիտական մրցույթի 2014թ. մրցանակակիրներ Ֆելիքս Ահարոնյանը, Իգոր Կարաչենցևը ու Բրենթ Թալինը, մրցույթում շահած գումարը կներդնեն գիտության մեջ: Այս մասին այսօր՝ սեպտեմբերի 17-ին, Երեւանում կայացած մամուլի ասուլիսին ասացին մրցույթի հաղթողները:
«Ինձ շնորհված 250 հազար դոլարից 50 հազար դոլարը պատրաստվում եմ տալ Գիտությունների ազգային ակադեմիային՝ գիտությունը զարգացնելու համար: Քանի որ ես աշխատում եմ Գեմանիայում եւ Իռլանդիայում գործող գիտական խմբերում, մնացած գումարն էլ կհատկացնեմ տարբեր երիտասարդ գիտնականների այդ խմբերում ներգրավելու եւ գիտական աշխատանքներ իրականացնելու համար»,-ասաց ֆիզիկոս, աստղաֆիզիկոս, գիտությունների դոկտոր Ֆելիքս Ահարոնյանը:
Ամերիկացի աստղագետ, գիտությունների դոկտոր Բրենթ Թալին նշեց, որ ինքը մտադիր է գումարը փոխանցել իր ստեղծած բարեգործական հիմնադրամին, որի շնորհիվ երիտասարդ գիտնականները այցելեն Հավայան կղզիների համալսարանի աստղագիտության ինստիտուտ, որտեղ ինքն աշխատում է. «Իհարկե, այդ գումարը կծառայի նաեւ հայազգի գիտնականների այցելություններին»:
Ռուս աստղագետ, գիտությունների դոկտոր Իգոր Կարաչենցեւն էլ իր մրցանակային գումարն ուղղելու է Հյուսիսային Կովկասում գործող 6 մետրանոց աստղադիտակի աշխատանքներին երիտասարդ գիտնականներ ներգրավվելուն:
Բրենթ Թալին շնորհակալություն հայտնեց մրցանակի համար, նաեւ զարմացավ, թե ինչպես Հայաստանի նման փոքր պետությունը կարող է նման մեծ գումարներ տրամադրել գիտական մրցույթին:
«Սովորաբար փոքր երկրները չեն կարողանում նման մրցույթներ անցկացնել, ֆինանսական առումով, զարմանալի է՝ որտեղից եք հայթայթել այսքան գումար այս մրցույթի համար»,-ասաց նա:
Նշենք, որ Ֆելիքս Ահարոնյանը(Իռլանդիա և Գերմանիա) մրցանակին առաջադրվել է Լինչեի ազգային ակադեմիայի(Իտալիա) կողմից «բարձր էներգիաների աստղաֆիզիկայի և տիեզերական արագացուցիչների ֆիզիկայի ոլորտում ակնառու ներդրման և Չերենկովի դիտակների ստերեոսկոպիկ համակարգի մշակման մեջ առաջատար դերի համար», Իգոր Կարաչենցևն ու Բրենթ Թալինը առաջադրվել են Հատուկ աստղադիտարանի(Ռուսաստան) կողմից «Տեղական Տիեզերքի տիեզերաբանության մեջ հիմնարար ներդրման համար»: Մրցանակի գումարից 250 հազար ԱՄՆ դոլարը հանձնվեց Ֆելիքս Ահարոնյանին, իսկ Կարաչենցևին և Թալինին`125-հազարական ԱՄՆ դոլար:
Վիկտոր Համբարձումյանի անվան միջազգային մրցանակը սահմանվել է ՀՀ նախագահի կողմից 2009 թվականին և ներկայումս աստղագիտության, աստղաֆիզիկայի և հարակից գիտությունների բնագավառում կարևորագույն մրցանակներից մեկն է աշխարհում: Այն հանձնվում է ցանկացած երկրի և ազգության ականավոր գիտնականների, որոնք նշանակալի ներդրում են ունենում աստղաֆիզիկայի եւ նրան հարակից ֆիզիկայի եւ մաթեմատիկայի ասպարեզում։
Մրցանակային ֆոնդը 500 հազար ԱՄՆ դոլար է, որը տրվում է երկու տարին մեկ անգամ` 2010 թվականից: Միջազգային հանձնաժողովը բաղկացած է 9 ականավոր գիտնականներից. Ռադիկ Մարտիրոսյան (ՀՀ ԳԱԱ նախագահ, հանձնաժողովի նախագահ), Գենադի Բիսնովատի-Կոգան (Ռուսաստան), Երվանդ Թերզյան(ԱՄՆ), Նորիո Կայֆու (ՄԱՄ նախագահ, Ճապոնիա), Միշել Մայոր (Շվեյցարիա), Վահե Պետրոսյան (ԱՄՆ), Մարտին Ռիս (Մեծ Բրիտանիա), Քաթրին Ցիսարսկի (ՄԱՄ նախկին նախագահ, Ֆրանսիա) և Ռոբերտ Ուիլյամս (ՄԱՄ նախկին նախագահ, ԱՄՆ):