Հայաստանի քաղաքացիները ազատ տեղաշարժվելու իրավունք ունեն եւ եթե որեւէ մեկը նման որոշում է կայացնում, պարտադիր չէ, որ տեղյակ պահի մարզային իշխանություններին: Այս մասին NEWS.am-ի թղթակցի հետ զրույցում ասաց Վայոց Ձորի մարզպետ Էդգար Ղազարյանը՝ անդրադառնալով քառյակի մարզային այցելություններին:
«Տեղյակ չեմ՝ ով է գնում մարզեր, ինչի համար են գնում մարզեր, Հայաստանի քաղաքացիները ազատ տեղաշարժվելու իրավունք ունեն եւ եթե որեւէ մեկը նման որոշում է կայացնում, պարտադիր չէ, որ տեղյակ պահի մարզային իշխանություններին: Հանրային բոլոր միջոցառումները՝ երթերը, հրապարակային միջոցառումները օրենքով են կարգավորվում»,-ասաց նա:
Անդրադառնալով հնարավոր խոչընդոտներ ստեղծելուն՝ մարզպետն ասաց, որ եթե որեւէ մեկը ուզում է նման միջոցառում անի, կարող է դիմել տեղական ինքնակառավարման մարմիներին:
Ինչ վերաբերում է մեզ հասած տեղեկություններին՝ իր եւ Եղեգնաձորի ԲՀԿ-ական քաղաքապետի միջեւ առկա լարված հարաբերություններին, Էդգար Ղազարյանը նշեց, որ իր առաջ խնդիր չի դրել մեկնաբանել որեւէ աղբյուրի տեղեկությունները: Նա վստահեցրեց, որ որպես մարզպետ՝ համայնքի ղեկավարների հետ ունի նորմալ, աշխատանքային հարաբերություններ:
