Երեւանի ներքաղաքային հասարակական տրանսպորտում քաղաքացիների սպասարկման եւ մատուցվող ծառայությունների որակի ուսումնասիրության նպատակով Երեւանի քաղաքապետարանի տրանսպորտի վարչության եւ «Երեւանտրանս» ՓԲԸ համապատասխան բաժնի ստուգայցերից զատ, այսուհետ պարբերական դիտարկումներ կիրականացնեն նաեւ վարչական շրջանների աշխատակազմերի ներկայացուցիչները:
Երեւանի քաղաքապետի հանձնարարականի շրջանակում սեպտեմբերի սկզբին ներքաղաքային ավտոբուսային եւ միկրոավտոբուսային երթուղիներում շահագործվող շուրջ 60 տրանսպորտային միջոցներում նման դիտարկումներ են իրականացրել Արաբկիր վարչական շրջանի աշխատակազմի աշխատակիցները: Արձանագրվել է վարորդների ծխելու 2, տրանսպորտային միջոցի անբավարար վիճակի 5, ուղեւորասրահում երաժշտություն միացնելու 4 դեպք։ Դիտարկման արդյունքների մասին տեղեկատվությունը տրամադրվել է «Երեւանտրանս» ՓԲԸ-ին` արձանագրված թերությունները ուսումնասիրելու եւ դրանք վերացնելուն ուղղված համապատասխան միջոցներ ձեռնարկելու համար։