Հայաստանի ոստիկանապետ Վլադիմիր Գասպարյանը աշնանային քաղաքական գործընթացներին մասնակցելու բացահայտ հայտ է ներկայացրել, ինչն անթույլատրելի է: Այս մասին, այսօր՝ սեպտեմբերի 17-ին, լրագրողների հետ հանդիպման ժամանակ նշել է Միջազգային եւ անվտանգության հարցերի հայկական ինստիտուտի ղեկավար Ստյոպա Սաֆարյանը՝ անդրադառնալով Վլադիմիր Գասպարյանի հայտարարությանը, թե թեժ աշուն խոստացողների համար կա «սառը ցնցուղ»:
«Ոստիկակապետը, եթե ուզում էր խոսել խնդրից, կարող էր բավարարվել՝ ասելով, թե իրենք իրենց պարտականությունները կատարելու են, ինչպես միջազգային կարգը կամ ՀՀ օրենսդրությունն է պահանջում, իրենք թույլ չեն տալու անկարգություններ, եւ վերջ: Բայց դրանից հեռու անցնել, ասել, որ եթե ուզում եք աշունը թեժ լինի, տեսեք՝ ես ինչպես կթեժացնեմ, սա արդեն նշանակում է՝ բացահայտ հայտ ներկայացնել աշնանային քաղաքական գործընթացներին մասնակցելու, ինչն անթույլատրելի է»,- ընդգծել է Սաֆարյանը:
Նշենք, որ ՀՀ ոստիկանապետ Վլադիմիր Գասպարյանը հայտարարել է, թե թեժ աշնան համար կան սառը ցնցուղներ, «իսկ երբ ցնցուղը չի օգնում, շատ ավելի թեժ աշուն կարող ենք կազմակերպել»: