Ճապոնական Furukawa Battery ընկերությունն էլեկտրական մարտկոց է ստեղծել, որն աշխատում է պարզ ջրով:
Mg Box կոչվող մարտկոցով կարելի է սմարթֆոն լիցքավորել: Ընկերության հայտարարության համաձայն՝ նորույթը վաճառքի կհանվի դեկտեմբերի կեսերին: Մարտկոցը կարժենա շուրջ 10.000 իեն (93 դոլար):
Սարքի լիարժեք աշխատանքի համար պետք է ընդամենը դրա մեջ երկու լիտր ջուր լցնել, ընդ որում, ջուրը կարող է լինել ինչպես քաղցրահամ, այնպես էլ ծովի: Մարտկոցը կարող է էլեկտրաէներգիա արտադրել 5 օր շարունակ: Ըստ ԻՏԱՌ ՏԱՍՍ-ի, այդ ընթացքում հնարավոր է շուրջ 30 անգամ լիարժեք լիցքավորել հեռախոսը:
Ճապոնացի մասնագետներն օգտագործել են մի համակարգ, որը հիմնված է մագնեզիումի, ջրի եւ թթվածնի փոխազդեցության վրա, որի արդյունքում էլեկտրաէներգիա է արտադրվում: Ընկերությունում վստահ են, որ իրենց նորույթն առավել օգտակար կլինի աղետի պայմաններում:
