Հայաստանում աշխատող գիտնականները նույնպես կարող են արժանանալ ակադեմիկոս Վիկտոր Համբարձումյանի անվան միջազգային գիտական մրցույթի մրցանակին, եթե համագործակցեն միջազգային համալսարանների հետ: Այս մասին այսօր՝ սեպտեմբերի 17-ին, լրագրողներին ասաց Վիկտոր Համբարձումյանի անվան միջազգային գիտական մրցույթի 2014թ. մրցանակակիր, ֆիզիկոս, աստղաֆիզիկոս, գիտությունների դոկտոր, Ֆելիքս Ահարոնյանը:
«Հայաստանում աշխատող գիտնականների համար նույնպես հնարավոր է ստանալ այս մրցանակը, քանի որ հաղորդակցությունն այժմ շատ հեշտ է, իսկ առաջ մի տարի սպասում էինք, որ մի գիտական հոդված տպվի որեւէ գիտական հանդեսում: Հարցն այն է, թե ինչքան էֆեկտիվ են այստեղ աշխատում, որ այդ համագործակցությունը կայանա: Եթե հաղթահարեն տրիվիալ պրոբլեմները սոցիալական, ապա համագործակցության առումով, ոչ մի խնդիր չի լինի»,-ասաց նա:
Վիկտոր Համբարձումյանի անվան միջազգային գիտական մրցույթի 2014թ. մյուս մրցանակակիր, ռուս աստղագետ, գիտությունների դոկտոր Իգոր Կարաչենցեւն ասաց, որ ինքը 6 տարի աշխատել է Վիկտոր Համբարձումյանի հետ, գիտական թեզը նրա մոտ է պաշտպանել. «Ամենարեւորն այն էր, որ երիտասարդ տարիքից շփվել եմ գիտության ականավոր ներկայացուցիչների հետ: Այս իմաստով ես երջանիկ մարդ եմ, որ սովորել եմ Համբարձումյանի դպրոցում, որը աստղաֆիզիկայի ականավոր ներկայացուցիչներից է»:
Ամերիկացի աստղագետ, գիտությունների դոկտոր Բրենթ Թալին նկատեց, որ այս մցույթը Հայաստանին միջազգային ճանաչում կբերի:
Նշենք, որ Ֆելիքս Ահարոնյանը (Իռլանդիա և Գերմանիա) մրցանակին առաջադրվել է Լինչեի ազգային ակադեմիայի (Իտալիա) կողմից «բարձր էներգիաների աստղաֆիզիկայի և տիեզերական արագացուցիչների ֆիզիկայի ոլորտում ակնառու ներդրման և Չերենկովի դիտակների ստերեոսկոպիկ համակարգի մշակման մեջ առաջատար դերի համար», Իգոր Կարաչենցևն ու Բրենթ Թալինը առաջադրվել են Հատուկ աստղադիտարանի (Ռուսաստան) կողմից «Տեղական Տիեզերքի տիեզերաբանության մեջ հիմնարար ներդրման համար»: Մրցանակի գումարից 250 հազար ԱՄՆ դոլարը հանձնվեց Ֆելիքս Ահարոնյանին, իսկ Կարաչենցևին և Թալինին`125-հազարական ԱՄՆ դոլար:
Վիկտոր Համբարձումյանի անվան միջազգային մրցանակը սահմանվել է ՀՀ նախագահի կողմից 2009 թվականին և ներկայումս աստղագիտության, աստղաֆիզիկայի և հարակից գիտությունների բնագավառում կարևորագույն մրցանակներից մեկն է աշխարհում: Այն հանձնվում է ցանկացած երկրի և ազգության ականավոր գիտնականների, որոնք նշանակալի ներդրում են ունենում աստղաֆիզիկայի եւ նրան հարակից ֆիզիկայի եւ մաթեմատիկայի ասպարեզում։
Մրցանակային ֆոնդը 500 հազար ԱՄՆ դոլար է, որը տրվում է երկու տարին մեկ անգամ` 2010 թվականից: Միջազգային հանձնաժողովը բաղկացած է 9 ականավոր գիտնականներից. Ռադիկ Մարտիրոսյան (ՀՀ ԳԱԱ նախագահ, հանձնաժողովի նախագահ), Գենադի Բիսնովատի-Կոգան (Ռուսաստան), Երվանդ Թերզյան(ԱՄՆ), Նորիո Կայֆու (ՄԱՄ նախագահ, Ճապոնիա), Միշել Մայոր (Շվեյցարիա), Վահե Պետրոսյան (ԱՄՆ), Մարտին Ռիս (Մեծ Բրիտանիա), Քաթրին Ցիսարսկի (ՄԱՄ նախկին նախագահ, Ֆրանսիա) և Ռոբերտ Ուիլյամս (ՄԱՄ նախկին նախագահ, ԱՄՆ):
