Լեռնային Ղարաբաղի Արտաքին գործերի նախարար Կարեն Միրզոյանը Հայաստանի եվրոպացի բարեկամներ կազմակերպության տնօրեն Էդուարդո Լորենցո Օչոայի հետ այս շաբաթ ավարտեց Բասկերի երկրում մեկշաբաթյա առաքելությունը:
Սեպտեմբերի 10-ից 16-ը կայացած այցը ներառում էր հանդիպումներ բասկ բարձրաստիճան պաշտոնյաների, այդ թվում Բասկերի խորհրդարանի նախագահ տիկին Բակարտխո Տեջերիա Օտերմինի եւ այլ պաշտոնյաների հետ՝ ինչպես մարզային, այնպես էլ տեղական մակարդակով:
Ուրբաթ օրը՝ սեպտեմբեր 12-ին, Բասկերի մարզային խորհրդարանը դարձավ Եվրոպական միությունում առաջին խորհրդարանը, որ ճանաչեց Լեռնային Ղարաբաղի ինքնորոշման իրավունքը մի քանի ԱՄՆ նահանգներից եւ Ավստրալիայի Նոր Հարավային Ուելսից հետո:
Ուրբաթ օրվա հանդիպումից հետո ոչ մի քաղաքական ուժ դեմ չքվեարկեց բանաձեւին Վիտորիայում գտնվող Բասկյան խորհրդարանում:
«Մենք ունեինք այս թեմայի շուրջ համաձայնության հասնելու հստակ կամք: Այն, ինչ մենք ուզում ենք շատ պարզ է. մենք ուզում ենք Լեռնային Ղարաբաղի հակամարտությունը լուծվի: Մենք հասկանում ենք, որ բոլոր ժողովուրդները ինքնորոշման եւ իրենց ապագան ժողովրդավարական ճանապարհով կառուցելու իրավունք ունեն: Մենք՝ որպես բասկեր, ճանաչում ենք բոլոր ժողովուրդներին եւ, իհարկե, Լեռնային Ղարաբաղը», - ասում է Մարիա Եվգենիա Արիզաբալգան՝ իշխող կուսակցության պատգամավոր, ով պատասխանատու է դոսյեների համար:
Բանաձեւի ընդունումից առաջ Գիպուզկոա նահանգի նախագահ Մարտին Գարիտանոն հռչակել է, որ ճանաչում է Լեռնային Ղարաբաղի Հանրապետությունը պարոն Միրզոյանի հետ Սան Սեբաստիանում ունեցած հանդիպման ժամանակ:
«Այս ժողովրդի տառապանքին պետք է վերջ դրվի, քանի որ նրանք արժանի են ազատ եւ անկախ երկիր ունենալուն, որը կերաշխավորի ապագա պետականություն եւ լեզվի ու մշակույթի լիակատար պահպանում», - նշել է Գարիտանոն:
Պարոն Միրզոյանը եւ ՀԵԲ տնօրենը նաեւ հանդիպել են Սան Սեբաստիանի, Տոլոսայի եւ Գերնիկայի քաղաքապետերին՝ քննարկելով հետագա հնարավոր համագործակցության հարցը, այդ թվում նաեւ Ստեփանակերտի, Շուշիի եւ այլ քաղաքների հետ մշակութային փոխանակումները:
Շաբաթ օրը՝ սեպտեմբերի 13-ին, պարոն Միրզոյանը համագործակցության եւ ճանաչման համաձայնագիր է կնքել Սան Սեբաստիանի քաղաքապետ Խուան Կառլոս Իզագիրեի հետ՝ մերձեցնելով Սան Սեբաստիան քաղաքը Լեռնային Ղարաբաղին եւ սահմանելով համատեղ ծրագրերի համար կոնկրետ ոլորտներ:
«Պարբերական շփումներ պետք է պահպանվեն քաղաքների եւ համապատասխան գերատեսչությունների միջեւ՝ հեշտացնելու փոխանակումների քննարկումները եւ համագործակցությունը, ինչպես նաեւ ընդհանուր հետաքրքրության հարցերը»,_նշված է համաձայնության մեջ:
Հաջող եւ արդյունավետ այցը ամփոփվել է երեքշաբթի օրը՝ սեպտեմբերի 16-ին:
