Ճանապարհային երթեւեկության կանոները խախտելու համար մինչեւ այժմ եղած տուգանքների համաներում պահանջող, կամիր գծանշանների դեմ բողոքող «Դուրս մեր գրպանից նախձեռնությունը» սեպտեմբերի 26-ին Հայաստանի ԴԱՀԿ ծառայության շենքի դիմաց բողոքի ակցիա կանցկացնի: Այս մասին այսօր՝ սեպտեմբերի 17-ին, կարմիր գծանշանների դեմ ցուցադրական ակցիայի ժամանակ լրագրողներին ասաց նախաձեռնության անդամ Վարդան Հակոբյանը (ֆոտոռեպորտաժ):
«Վճարովի ավտոկայանտեղիում կայանելու մեկ ժամվա տուրքը, համաձայն ավագանու որոշման, վճարվում է ընթացիկ տարվա ընթացքում, այսինքն՝ մինչեւ ընթացիկ տարվա վերջ: Բայց շատ դեպքերում քաղաքապետարանը միանգամից տուգանում է, ապա առանց դատարան դիմելու միանգամից ԴԱՀԿ է դիմում, մարդկանց հաշիվները սառեցվում են առանց նրանց գիտության»,-ասաց Վարդան Հակոբյան:
Վարդան Հակոբյանը տեղեկացրեց, որ իրենք դիմել են Մարդու իրավունքների պաշտպանի գրասենյակ, որն էլ արդեն ուսումնասիրել է, թե վճարովի ավտոկայանատեղիները որ կետերով չեն համապատասխանում ՀՀ օրենքներին. «Մարդու իրավունքների պաշտպանի գրասենյակն արդեն դիմել է քաղաքապետարան, որն առայժմ ոչ մի ձեւով չի հիմնավորել իր գործառույթները: Բայց կա խելամիտ ժամկետ, որից հետո Մարդու իրավունքների պաշտպանի գրասենյակը կանցնի հաջորդ քայլին՝ Սահմանադրական դատարանում այս ամենը վիճարկելուն»:
Վարդան Հակոբյանը նշեց նաեւ, որ ԴԱՀԿ ծառայության մոտ ակցիայից հետո՝ հոկտեմբերի 3-ին, կկայանա նախաձեռնության անհնազանդության ավտոերթը:
«Մենք այսպես, ծամոնի նման անվերջ ձգել չենք կարող: Եթե մինչեւ հոկեմբերի 3-ը կարմիր գծերի եւ համաներման հետ կապված կոնկրետ որոշում չեղավ, խոսատանում ենք հզոր անհնազանդության ավտոերթ: Մեր 600-700 հազար վարորդներն ընկած են կարմիր գծերի, արագաչափերի կեղեքող համակարգի ծուղակում»,-ասաց Վարդան Հակոբյանը:
Հիշեցնենք, որ նախաձեռնությունն այսօր ցուցադրական ակցիա անցկացրեց ՝ 23 րոպե առանց վճարելու կանգնելով կարմիր գծերի տարածքում: Վարորդները պատրաստվում են սպասել, մինչեւ իրենց տուգանքի ծանուցումները գան, որպեսզի դիմեն քաղաքապետարան՝ դրանք վերացնելու պահանջով: Եթե իրենց պահանջը չբավարարվի, նրանք պատրաստվում են դիմել դատարան: