Իրաքի վարչապետ Հայդեր ալ-Աբադին հայտարարել է, որ երկիրը կարող է պայքարել «Իսլամական պետություն» խմբավորման դեմ՝ առանց օտարերկրյա ցամաքային զորակազմի:
Associated press գործակալությանը տված հարցազրույցի ժամանակ վերջինս միջազգային հանրությանը կոչ է արել ընդլայնել հարեւան Սիրիայի ծայրահեղականների դեմ պայքարի արշավը, քանի որ, նրա խոսքով՝ ԻՊ-ի դեմ պայքարը անվերջանալի կլինի, եթե այն իրականացվի միայն մեկ երկրի սահմաններում, հաղորդում է «ՌԻԱ Նովոստին»:
«Իսլամական պետություն» ծայրահեղական խմբավորումը, օգտվելով Իրաքի բնակչության մի մասի՝ երկրի կենտրոնական իշխանությունների նկատմամբ դժգոհությունից, մի քանի հյուսիսային եւ հյուսիս-արեւմտյան նահանգներ է զավթել, որտեղ հայտարարել է այսպես կոչված «իսլամական խալիֆայության» ստեղծման մասին: Ծայրահեղականները ահաբեկում են բնակիչներին՝ ստիպելով նրանց թողնել ամեն ինչ եւ փախչել: ԻՊ-ի վերահսկողության տակ գտնվող շրջաններում փախստականների թիվը հասել է մի քանի հարյուր հազարի, մի քանի հազարը զոհվել են եւ հազարավոր մարդիկ ահաբեկիչների կողմից առեվանգվել:
Միջազգային հանրությունը վտանգավոր ահաբեկչական կազմակերպության ոչնչացման համար կոալիցիա է կազմում, առանձին երկրներ Իրաքին ռազմական եւ հումանիտար օգնություն են տրամադրում:
