Հայաստանում եւ Ադրբեջանում ԱՄՆ դեսպանների պաշտոնի երկու թեկնածուներն էլ միակարծիք են, որ ԵԱՀԿ Մինսկի խումբը ղարաբաղյան հակամարտության կարգավորման բանակցությունները շարունակելու համար լավագույն ձեւաչափն է: Ամերիկայի Հայ Դատի հանձնախմբի փոխանցմամբ՝ այս մասին սեպտեմբերի 17-ին դիվանագետները հայտարարել են ամերիկյան Սենատի հանձնաժողովում լսումների ժամանակ:
Հայաստանում ԱՄՆ դեսպանի պաշտոնի թեկնածու Ռիչարդ Միլզի կարծիքով՝ հակամարտության կարգավորման հարցում անհրաժեշտ է հենվել երեք սկզբունքի վրա. ուժի չկիրառման, տարածքային ամբողջականության, ինչպես նաեւ ազգերի ինքնորոշման իրավունքի:
Հիշեցնենք, որ սեպտեմբերի 17-ին ԱՄՆ Սենատի արտաքին հարաբերությունների հանձնաժողովում լսումներ են անցկացվել, որոնց ընթացքում դիտարկվել են Հայաստանում եւ Ադրբեջանում ԱՄՆ դեսպանների պաշտոնների թեկնածությունները:
Ավելի վաղ ԱՄՆ նախագահ Բարաք Օբաման Հայաստանում դեսպանի պաշտոնում առաջադրել էր Ռիչարդ Միլզի, իսկ Ադրբեջանում՝ Ռոբերտ Սեկուտայի թեկնածությունները: