«Հյուսիս-Հարավ» մայրուղու՝ Թալին եւ Գյումրի քաղաքների միջեւ ճանապարհահատվածի փորձաքննության ավարտը հետաձգվել է: Այդ մասին այսօր՝ սեպտեմբերի 18-ին, կառավարության նիստին հայտարարեց տրանսպորտի փոխնախարար Արթուր Առաքելյանը:
Ի պատասխան վարչապետի հարցին՝ ինչո՞վ է պայմանավորված այդ հետաձգումը, Առաքելյանը բացատրեց մայրուղով գյուղատնտեսական տեխնիկայի եւ անասունների տեղաշարժման միջոցների ուսումնասիրության անհրաժեշտությամբ: «Դա, իհարկե, ճիշտ է, սակայն ինչո՞ւ ավելի վաղ չեք քննարկել: Կամ այնպիսի ժամկետներ պետք է սահմանվեին, որոնց մեջ կարելի էր տեղավորվել: Թե չէ մշտապես ժամանակացույցից դուրս ենք հայտնվում, եւ դրա համար ոչ ոք պատասխան չի տալիս», - նշեց վարչապետը:
«Հյուսիս-Հարավ» ավտոմայրուղին անցնում է Հայաստանի իրանական սահմանից (Մեղրի) մինչեւ վրացական սահման (Բավրա): Նախագծի գլխավոր ֆինանսավորողը Ասիական զարգացման բանկն է (960 մլն դոլարից՝ 500 մլն դոլարը): Թալին-Գյումրի 65 կմ-անոց հատվածը կառուցված է վարկային ծրագրի երրորդ տրանշով, որի մասին համաձայնությունը ստորագրվել է երկու դոնորների հետ՝ Եվրոպական ներդրումային բանկի (2013թ. նոյեմբերին) եւ Ասիական զարգացման բանկի (2014թ. մարտին):
