Սյունիքի մարզի ընդհանուր իրավասության դատարանն այսօր՝ սեպտեմբերի 18-ին, հրապարակեց «Գոմեշի մսի» գործով վճիռը՝ ամբաստանյալ, Կապանի մսի կոմբինատի նախկին տնօրեն Ալբերտ Օհանջանյանին դատապարտելով 3 տարի, 3 ամիս ժամկետով ազատազրկման՝ դատավճիռը պայմանականորեն չկիրառելով եւ նրա հետագա վարքի նկատմամբ սահմանելով չորս տարվա հսկողություն։
Հիշեցնենք, որ Օհանջանյանը տավարի մսի փոխարեն 82 տոննա հնդկական արտադրության գոմեշի միս էր մատակարարել Պաշտպանության նախարարությանը՝ պատճառելով 126 միլիոն 936 հազար դրամի վնաս։
Օհանջանյանն ամբողջությամբ փոխհատուցել է վնասը, նա իրեն մեղավոր է ճանաչել, եւ այս գործով արագացված դատաքննություն էր իրականացվել։
Ալբերտ Օհանջանյանի փաստաբան Իրինա Մանուկյանը NEWS.am-ի հետ զրույցում հրաժարվեց մեկնաբանել դատավճիռը՝ նշելով, որ դատարանն ըստ էության բավարարել է ոչ միայն դատախազի, այլեւ պաշտպանական կողմի միջնորդությունը՝ պատժաչափը պայմանականորեն չկիրառելու վերաբերյալ։